Salamo 89 - Buki Tabu Lowaenei 1919

SALAMO 89.

¹ Ieoba ‘ina nua‘ole‘oleao manudi ia da wari ‘ataia: ‘Awaguiega ‘imu bubuna ‘ai‘aila ia da e‘ita epata tomota iauiauna ‘edia.

² Ni‘atu ia gwae ta ‘enega, Nua‘ole‘ole si da ‘abi tu‘e ‘ataia; ‘Imu bubuna ‘ai‘aila ‘u da giepa‘arina garewa ‘arena ‘enaia.

³ Ni‘atu ona‘upa‘upa ia bubuna ‘agu ‘esi‘esinua ma‘ieana, Dabida ‘igu ‘ari‘e ‘ena ia ona‘upa‘upa;

⁴ Tubumuao ia da giepa‘ara ‘ataedi, Ta ‘imu ‘ebemi esaesa ia da ‘abi tu‘eie ga epata tomota iauiauna ‘edia. (Sela.)

⁵ Ta garewa ‘imu guinua sinabwadi si da tupudi, Ieoba ie; ‘Imu bubuna ‘ai‘aila wate etaetabudi ‘idi deriegogona ‘enaia.

⁶ Iaita garewaia Ieoba ‘ena ta da ‘awanadigega ta ‘enega? Iaita toewaiwai natunao gamwagamwanidia Ieoba nadigega,

⁷ Eaubada to didiga sana taudi iaruiaruadi ‘esasena ‘idi deriegogona ‘enaia, Ta iauiaudi si mia sakowasiena tauna ‘ana matauta sinabwana?

⁸ Ieoba ie, bodao ‘idi Ieoba, Iaita ‘i ewaiwai ‘oio nadigega, IAA ie? Ta ‘imu bubuna ‘ai‘aila ‘i mia sakowasiemu.

⁹ Ora ‘ina gagasa ‘u loinena: ‘Ena lisuna si lo‘oea‘oea, ‘u giemwa‘uleiedi.

¹⁰ Raaba ‘u weara lelewanena, ‘atua ‘e bweu ‘i esilae; ‘Amu tarauwarao ‘u lelewanedi ‘imu waiwai nimanega.

¹¹ Garewa ‘imu iage, bare‘u wate ‘imu iage: Gabura, ta ‘ina maa, ‘oio ‘adi ‘autui ‘u sa‘udi.

¹² Nota ta Sauta, ‘oio ‘u mweruruidi: Tabora ta Erimona si guausoara ‘amu esanega.

¹³ Nimaio waiwaina: Nimaio pa‘arina, ta ‘ataio ‘i mia tu‘e.

¹⁴ Bubuna paruparuna ta loina taudi ‘imu ‘ebemi esaesa ‘ana ‘autui: Nua‘ole‘ole ta ona ‘ai‘aila matamuia si tautauia.

¹⁵ Tomota guausoara ‘enana si mwaramwaratoni taudi si bobo‘ana: Ieoba ie, maniniio ‘ina ma‘edana ‘ena si lopilidadana.

¹⁶ ‘Amu esanega si guausoara asiata maibo‘anega: Ta ‘imu bubuna paruparunega si mia tu‘e.

¹⁷ ‘Oio ‘idi waiwai ‘ina esaesa ta ‘enega: Ta ‘imu nua bobo‘ana ‘enega ‘ima ioguli ‘i da mia tu‘e.

¹⁸ ‘Ida lawa Ieoba ‘ina iage ta ‘enega; Ta ‘ida king Iseraela ‘ina Tabu Tebweuna ‘ina tai.

¹⁹ Ga madawarega ‘u ona ‘imu toiaruiarua‐‘esasena ‘edia, Ta ‘u gwae, Leme ni‘atu ia sa‘u ‘e bweuna ‘i ewaiwai ‘enaia; ‘E bweuna tomota ‘ediega si ‘esinuena ni‘atu ia gitu‘eiena.

²⁰ ‘Igu ‘ari‘e Dabida ni‘atu ia lobena; ‘Igu bunama tabu ‘enega ia siwarorona.

²¹ Tauna ‘enega nimagu ‘i da pa‘arina; Nimagu wate ‘i da giepa‘arina.

²² Tarauwara gea‘abo ‘i da didigena; Nai bubuna to‘umalina natuna ‘i da ununa.

²³ Ta ‘ana tarauwarao ia da ‘aumwa‘utedi matanaia, Ta taudi si guitoasena ia da unudi.

²⁴ Ta ‘igu bubuna ‘ai‘aila ta ‘igu nua‘ole‘ole ma‘ieana si da miami; Ta ‘agu esanega ‘ina ioguli ‘i da mia tu‘e.

²⁵ Wate nimana ia da sa‘u ora ‘enaia, Ta ‘ataina boasi‐‘awanao edia.

²⁶ ‘Eguia ‘i da bwau, ‘Oio tamagu, ‘Igu Eaubada, ta ‘agu ‘etoseana ‘ina gurewa.

²⁷ Wate ia da bubuna ‘i da ‘igu tomatua, Bare‘u ‘ina ‘inapwanao ‘idi to lo‘etana sana.

²⁸ ‘Igu nua‘ole‘ole leleana ia da egagara ‘ataena. Ta ‘igu ona‘upa‘upa ma‘ieana ‘i da tooro pa‘arina.

²⁹ Wate tubunao ia da bubudi be si da mia ‘ataia, Ta ‘ina ‘ebemi esaesa ‘atua garewa asiatanao.

³⁰ ‘Abo natunao ‘igu loina si e‘idi‘idiena, Ta ‘igu loinao nigea ‘edia si tautauia;

³¹ ‘Abo ‘igu loina tomwanao si gibesobesodi, Ta ‘igu ona nigea si ‘ita‘i‘isidi;

³² Ga ‘idi li‘oa loina ia da e‘isa keweliweliliega, Ta ‘idi bubuna bokobokona sapiega.

³³ Ta ‘igu nua‘ole‘ole nigea ‘enega ia da ‘ewa gumwari, Nai ‘igu bubuna ‘ai‘aila ia da tagwara be ‘i ekabokabo.

³⁴ Igu ona‘upa‘upa gea‘abo ia da gibesobeso, Nai iage ni‘atu sopaguiega ‘i apwesawa ia da gibunina.

³⁵ Iage ‘e bweuna ia ona‘upa‘upa ‘igu bubuna ‘esasena ‘enega; Gea‘abo ia da onakabokabo Dabida ‘enaia;

³⁶ Tubunao si da mia ataia, Ta ‘ina ‘ebemi esaesa ‘atua sinara mataguia.

³⁷ ‘I da pa‘arina ‘ataia nawarae na‘ieana, Ta na‘ieana ‘ebe‘ita ‘ai‘aila nina garewaia. (Sela.)

³⁸ Ta ni‘atu u ‘upwa iaula ta ‘u e‘idi‘idi, Ni‘atu ‘u gamwasoara ‘imu tai orooroa ‘enaia.

³⁹ ‘Imu ‘ari‘e ‘ina ona‘upa‘upa ni‘atu ‘u guitoasena: ‘Ana peaula esaesa ‘u gibesobesona ga bare‘uia.

⁴⁰ ‘Ina ‘ari iauiauna ni‘atu ‘u buiena; ‘Ina ‘ebemia pa‘aridi ni‘atu ‘u loesawaridi.

⁴¹ Iauiaudi ‘edega si tautauia si ‘oaena: Tauna ‘i e‘esinasinara gosenao ‘edia.

⁴² ‘Ana tarauwarao ‘ataina ‘u gitu‘eiena; ‘Ana tarauwarao iauiaudi ‘u gieguausoaridi.

⁴³ Tamo, ‘ina sisi saia matana ‘u giiouna, Ta nigea ‘u gietoorona saia ‘enaia.

⁴⁴ ‘Ina tuiaiara ni‘atu ‘u loegumwarina, Ta ‘ina ‘ebemi esaesa u ‘ula mwa‘utena bare‘uia.

⁴⁵ ‘Ana tuta tubuau ‘ina asiatao ni‘atu ‘u giekukupedi: Omaiamaia ‘enega ‘u sa‘u bodena. (Sela.)

⁴⁶ Ieoba ie, Tuta ‘eisa ‘u da kwaiemu ataia? Tuta ‘eisa ‘imu gamwasoara ‘i da ‘ara‘arata awe sabelulu ‘atua?

⁴⁷ ‘Igu tuta ‘ana kukupa ‘u da nua‘i‘isina: Tai natudiao iauiaudi ni‘atu ‘u mweruruidi to iage besobeso manuna!

⁴⁸ To tai tauna ‘i da bobo‘ana ta gea‘abo mwawasa ‘i da ‘itena, To tai tauna iaruiaruana ‘i da ‘etoseena Seola nimanega? (Sela.)

⁴⁹ ‘Inapwana, mane ‘imu nua‘ole‘ole lowa? Taudi ‘u ona‘upa‘upa Dabida ‘ena ‘imu bubuna ‘ai‘aila ‘enega?

⁵⁰ ‘Inapwana, ‘imu ‘ari‘eao ‘adi sinara ‘u da nua‘i‘isina; Bubuna nina ‘enega tomota waiwaidi iauiaudi ‘idi sinara ia ‘a‘arina;

⁵¹ ‘Enega ‘amu tarauwarao si sinasinara, Ieoba ie, ‘Enega ‘imu ‘oro‘oroidi ‘ae‘iaediao si sinaridi.

⁵² Ieoba ta da tuputupuna ataia. Emen ta Emen.