Salamo 88 - Buki Tabu Lowaenei 1919

SALAMO 88.

¹ Ieoba ie, ‘agu ‘etoseana ‘ina Eaubada, Ni‘atu ia bwau asiataia be boiboiia matamuia:

² ‘Igu sidasida ‘i da rugu matamuia; Tenaio ‘u da ‘e‘etome‘e ‘igu bwau ‘enaia:

³ Iaruiaruagu ‘i maa ‘elo‘uiao ‘ediega, Ta iawasigu Seola ‘ena ‘i doro deinaia.

⁴ Si sawegu taudi si mwa‘uta gaulaia ‘edia; ‘Abo‘agu ‘atua tai nigea ‘ina to lemamo:

⁵ Si ‘ulegu to mwawasa ‘edia, ‘Atua to esilae ‘ari‘ari ‘ena si ‘eno‘eno, Taudi nigea wate ‘u da nua‘i‘sidi; Ta nimamuiega si ‘upwaiauledi.

⁶ Gaula lo‘ubuna ‘ena ‘u sa‘ugu, Esena guguioi ‘edia, ni‘uni‘udi ‘edia.

⁷ ‘Imu gamwasoara i ‘eno pa‘ara ‘eguia, Ta ‘imu lisuiao iauiaudi ‘ediega ‘u gielo‘uiagu. (Sela.)

⁸ Goseguao ‘eguiega ‘edasoraia ‘u tauiedi; ‘U bubugu be ia gadilulu ‘edia: Ia miabodena, ta nigea kapekapeana ia apwesa.

⁹ Matagu ‘i ia‘ara dedoi manuna: Asiata iauna ‘emuia ia bwaubwau, Ieoba ie, ‘Emuia nimagu ia gilagasina.

¹⁰ ‘Ebenua‘owana ‘u da e‘ita nai tomwawasa ‘edia? To mwawasa si da tooro nai be si da tupuio? (Sela.)

¹¹ ‘Imu oboboma nua‘ole‘ole si da simana ‘ari‘ari ‘ena nai? Nai ‘imu bubuna ‘ai‘aila Saoora ‘enaia?

¹² ‘Imu guinua sinabwadi si da mwaratonidi nai guguioi ‘ena? Ta ‘imu bubuna paruparuna nuapupura ‘ana ‘asa ‘enaia?

¹³ Ta ‘emuia, Ieoba ie, ni‘atu ia bwau, Ta gonagonaia ‘igu sidasida matamuia ‘i da mai.

¹⁴ Ieoba, to‘ase manuna iaruiaruagu u ‘ewa iaulena? Toase manuna maniniio ‘eguiega ‘u etokwaiena?

¹⁵ ‘Igu tuta tubuau ‘enega ia elo‘uia ta ia mwawamwawasa: ‘Ena didigaiao ia lobedi ‘ategu ‘i looniu.

¹⁶ ‘Imu gamwasoara didiga ‘i siwa bodegu: ‘Imu didigaiao ni‘atu si ‘upwa iaulegu.

¹⁷ Si sakosakowasiegu boasi ‘atua asiata maibo‘ana; Si mai ‘oabu‘oabuiegu rererea.

¹⁸ ‘Agu gabura ta ‘agu ‘arauna ni‘atu ‘eguiega ‘u sa‘u ‘edasoredi, Ta gosiagu guguioi ‘enaia.