Salamo 86 - Buki Tabu Lowaenei 1919

SALAMO 86.

¹ Ieoba ie, ‘u da sana mwa‘utama, ta ‘eguia ‘u da ona limanama; ‘Abo‘agu ia gomabeso ta nanaewagu ta ‘enega.

² Iaruiaruagu ‘u da ‘ita‘i‘isi; ‘abo‘agu tapwatapwarorogu ta ‘enega: ‘Oio ‘igu Eaubada, ‘imu ‘ari‘e i ‘emisemu ‘u da ‘etoseena.

³ ‘Inapwana ie, ‘eguia ‘u da nua‘ole‘ole; ‘Emuia ia bwau asiata maibo‘ana ta ‘enega.

⁴ ‘Imu ‘ari‘e iaruiaruana ‘u da gieguausoara; ‘Inapwana ie, ‘emuia iaruiaruagu ia gitu‘eiena ta ‘enega.

⁵ ‘Oio ta ‘enega, ‘Inapwana, ‘u bobo‘ana, ta to‘umalina ‘u kweu manini, Ta iauiaudi ‘emuia si bwau ‘edia ‘u nua‘ole‘ole sinabwana.

⁶ Ieoba ie, tenaio u ‘e‘etome‘e ‘igu sidasida ‘enaia; Ta ‘igu ‘awanoiao ‘enadi ‘u da nonona.

⁷ Asiata ia ‘elo‘uia ‘emuia ia da bwau; ‘Eguia ‘u da onalimana ta ‘enega.

⁸ ‘Inapwana ie, nigea ‘e bweu ‘emuia nadigega eaubadao ‘edia; Wate nigea guinuao ‘imu guinuao nadigega.

⁹ ‘Inapwana ie, ‘ebeloina iauiaudi ni‘atu ‘u mweruruidi si da mai ta si da bwagobwago matamuia; Ta ‘amu esana si da ‘awaeseesei.

¹⁰ ‘Oio sinabwaio ta ‘enega, ta iage ‘ebenuaowana ‘u guinuedi: ‘Oio Eaubada tebweuio.

¹¹ Ieoba ie, ‘imu ‘eda ‘u da e‘ita ‘eguia; imu ona‘ai‘ailega ia da tautauia: ‘Ategu ‘u da gienua‘ebweuiena be ‘amu esana ‘i da matautena.

¹² ‘Inapwana ie ‘igu Eaubada, ia da tupuio ‘ategu maibo‘anega; Ta ‘amu esana ia da ‘awaeseese ‘atae.

¹³ ‘Imu nua‘ole‘ole ‘i sinabwa ‘eguia ta ‘enega; Ta iaruiaruagu u ‘etoseena gaula lo‘ubunega.

¹⁴ Eaubada ie, to gagasa si tooro mataguia, Ta tai didiga ‘idi deriegogona iaruiaruagu ni‘atu si ‘ebesena, Ta nigea ‘oio si sa‘usa‘u matadia.

¹⁵ Ta ‘oio, ‘Inapwana ie, ‘oio Eaubada nua‘ole‘ole ta oboboma ‘ediega ‘u maa, Gamwasoara manuna ‘u so‘iso‘i, ta ‘imu nua‘ole‘ole ta ona ‘ai‘aila si ‘elosinabwa.

¹⁶ Ie! ‘eguia ‘u da sana‘ilama, ta eguia ‘u da ‘atenua‘ole‘ole; ‘Imu waiwai ‘u da ‘ebwaeae ‘imu to guinua ‘enaia, Ta ‘imu ‘ari‘e mewainena natuna ‘u da ‘etoseena.

¹⁷ We‘iwe‘iiaia bobo‘ana manuna ‘u da e‘ita ‘eguia; Be ‘enega taudi si guitoasegu, si da ‘itena, ta si da omaiamaia, ‘Oio, Ieoba, ni‘atu ‘u lemegu, ta ‘u gieguausoarigu ta ‘enega.