Salamo 85 - Buki Tabu Lowaenei 1919

SALAMO 85.

¹ Ieoba, ‘imu ‘asa ‘ena ‘u bubuna ‘ai‘aila: Iakobo ‘ina miaioniionina ni‘atu u ‘ilenama.

² ‘Imu tomota ‘idi bubuna bokobokona ni‘atu ‘u kweuna,

³ ‘Idi loegesi iauiauna ni‘atu ‘u bodena. (Sela.) ‘Imu gamwasoara maibo‘ana ni‘atu u ‘ewa iaulena: ‘Imu egamwagamwagu ‘ana didiga ‘enega ni‘atu ‘u gibunimu.

⁴ ‘Ama ‘etoseana ‘ina Eaubada ie, ‘emaia ‘u da sana‘ilama, Ta ‘imu gamwasoara ‘emaia ‘u da sa‘u.

⁵ ‘U da gamwasoara ‘ataia nai ‘emaia? ‘Imu gamwasoara ‘u da lisina ga ‘epata tomota iauiaudi?

⁶ Gea‘abo nai ‘u gietapewa limema: Be ‘enega ‘imu tomota si da guausoara ‘emuia?

⁷ Ieoba ie, ‘imu nua‘ole‘ole ‘u da e‘ita ‘emaia, Ta ‘imu ‘etoseana ‘u da ‘ebwaeadaisima.

⁸ Iage Eaubada Ieoba ‘i da one ia da nonona: ‘I da ona guguia ‘ina tomota ‘edia ta ‘enega, ta ‘ina to ‘esasena ‘edia: Ta gea‘abo si sanasana‘ila limana euwauwa ‘enaia.

⁹ Ona ‘ai‘aila ‘ina ‘etoseana taudi si matautena ‘i mia serabedia; Be ‘enega esaesa ‘ida ‘asa ‘ena ‘i da miami.

¹⁰ Nua‘ole‘ole ta ona ‘ai‘aila si eloba; Bubuna paruparuna ta guguia ni‘atu si e‘awamui.

¹¹ Ona ‘ai‘aila bare‘uiega ‘i tabwa; Ta bubuna paruparuna garewega ni‘atu i ‘ita mwa‘uta.

¹² Tamo, Ieoba iage nina ‘i bobo‘ana ‘i da ‘ebwaeio; Be ‘ida ‘asa ‘i da ua loebwaina.

¹³ Bubuna paruparuna matanaia ‘i da tauia; Ta ‘ae‘iaenao ‘i da bubudi be si da ‘eda.