Salamo 84 - Buki Tabu Lowaenei 1919

SALAMO 84.

¹ ‘Imu anua‐tabenakele, ‘adi ‘ita bobo‘ana, Bodao ‘idi Ieoba ie!

² Iaruiaruagu ‘i nuanuana, tamo, ‘i eiawasipelapela tuga Ieoba ‘ina ‘ari gamwanaia manuna; ‘Ategu ta esiogu si bwau Eaubada maiawasina ‘enaia.

³ Tamo, dinewiwiia ni‘atu ‘ina anua ‘i lobena, Ta didibeabea ‘ina newa ‘i lobena tauna manuna, ‘ena natunao ‘i da sa‘udi, Tuga ‘imu ‘ebetariao, ‘oio bodao ‘idi Ieoba, ‘Igu King, ta ‘igu Eaubada.

⁴ Taudi ‘imu anuaia si miami si mia bobo‘ana: Si da tupuio ataia. (Sela.)

⁵ Tai nina ‘ina waiwai ‘emuia ‘i miami ‘i mia bobo‘ana; Tauna ‘atenaia ‘eda sinabwadi si miami Siona ‘ena.

⁶ Sa‘ara Dedoi si rubwarena ta si bubuna be weruwerupwa ‘idi esena; Tamo, gimi ‘usana ‘i bodena iage bobo‘adi ‘ediega.

⁷ Si tauia waiwai ga waiwai ‘enaia, Iauiaudi si apwesa Eaubada matanaia Siona ‘ena.

⁸ Bodao ‘idi Ieoba Eaubada ie, ‘igu sidasida ‘u da nonona; Iakobo ‘ina Eaubada ie, ‘u da enonotenasi. (Sela.)

⁹ Eaubada ‘ima lawa ie, ‘u da ‘ita, Ta ‘imu ‘orooroina maninina ‘u da ‘ita.

¹⁰ Asiata ‘e bweuna ‘imu ‘atamana ‘ena ‘i bobo‘ana wawasae tausana ‘edia ta ‘enega. ‘Abo‘agu nuanuagu wawasae ia da ‘awa ‘ana to‐‘ita‘i‘ita ‘igu Eaubada ‘ina anua ‘enaia, Ta gea‘abo to‘umalina ‘ina anuao ‘edia ia da miami.

¹¹ Ieoba Eaubada Tauna sinara ta lawa ta ‘enega: Ieoba nua‘ole‘ole ta esaesa ‘i da ‘ebwaea: Taudi si tauia ‘ai‘aila gea‘abo ‘e bweu iage bobo‘ana ‘ediega ‘i da egagare.

¹² Bodao ‘idi Ieoba ie, Tauna ‘emuia i ‘emisa tauna ma‘ina guausoara.