Salamo 83 - Buki Tabu Lowaenei 1919

SALAMO 83.

¹ Eaubada ie, gea‘abo u ‘e‘enono: Gea‘abo u ‘emwa‘emwa‘ule, ta gea‘abo ooio ‘i nuanua, Eaubada ie.

² U ‘ita, ta ‘enega, ‘amu tarauwarao si bwau toila: Ta taudi si guitoasemu ni‘atu debadiega si gagasa.

³ Wasegigi si nuanua ‘imu tomota manudi, Ta si nuanua rererea ‘imu to mia kwaiao manudi.

⁴ Ni‘atu si ona, Wa da ma, be ta ‘upwa iauledi be gea‘abo si da e‘ebeloina; Be ‘enega Iseraela ‘ana esana gea‘abo ‘e bweu ‘i da nuanua‘i‘isi.

⁵ Si eonaona rererea nuadi ‘ebweuna ‘enega ta ‘enega; Manuio tuga ona‘upa‘upa si bubuna:

⁶ Me Edoma ta me Iseraela ‘idi anuao; Moaba, ta Agareneao;

⁷ Gebala, ta Amona, ta Amaleka; Pilisitia to mia Turo ma‘edi:

⁸ Asiria wate si egogona ma‘edi; Lota tubunao ni‘atu si lema. (Sela.)

⁹ ‘Edia ‘u da guinua ‘atua Midiana ‘enaia; Ta Sisera manuna, ta Iabina manuna, boasi ‘awa Kisona ‘enaia:

¹⁰ Taudi si saoora Enidora ‘ena; Taudi si ebi‘i ‘atua bare‘u manuna.

¹¹ ‘Idi ‘inapwanao ‘u da bubudi be si da nadigega Oreba ta Seeba; Tamo, ‘idi ‘inapwanao iauiaudi ‘atua Seba ta Salimuna:

¹² Taudi si gwae, Ta da ‘ewa ‘ida iage Eaubada ‘ina anuao.

¹³ ‘Igu Eaubada ie, ‘u da bubudi be si da ekau bwawabwawa ‘atua; ‘Atua sumwana iagila matanaia.

¹⁴ ‘Atua awe sabelulu mitawa i ‘arasina, Ta ‘atua awe meiana ‘oea ‘i loe‘abidi;

¹⁵ Nadigega ‘u da pa‘idi ‘imu wediliega, Ta ‘u da didigedi ‘imu iagila sinabwanega.

¹⁶ Maninidi ‘u da loemae omaiamaiega; Be ‘enega ‘amu esana si da ‘ebese, Ieoba ie.

¹⁷ ‘U da tagawaredi be si da omaiamaia ta si da ‘atesa‘ara ‘ataia; Tamo, si da loniu ta si da saoora:

¹⁸ Be ‘enega si da mwaratoni ‘aene tebweuio, ‘amu esana IEOBA, To Lo‘etana Sana bare‘u maibo‘ana debanaia. ‘Oio.