Salamo 82 - Buki Tabu Lowaenei 1919

SALAMO 82.

¹ Eaubada ‘i tooro Eaubada ‘ina deriegogona ‘enaia; ‘I etara eaubadao gamwagamwanidia.

² Tuta ‘eisa wa da etara bokobokona, Ta to to‘umalidi maninidi wa da ‘amaiabe? (Sela.)

³ Pesieda ta gomabeso wa da taraedi: Eloelo‘uiadi ta kakaedi ‘edia wa da bubuna paruparu.

⁴ Gomabeso ta nanaewadi wa da ‘etoseedi: To to‘umalidi nimadi ‘ediega wa da lisidi.

⁵ Nigea si mwaratoni, ta nigea si sinapuna; Si lopilidadana guguioi ‘ena: Bare‘u ‘ina ‘autui iauiauna si loniu.

⁶ Ia gwae, ‘Omi eaubadao, Ta iauiaumi To‐lo‘etana sana natunao.

⁷ Tua tuga wa da mwawasa tai ‘atua, Ta wa da be‘u ‘inapwana ‘e bweu nadigega.

⁸ Eaubada ie, ‘u da tooro, ta bare‘u ‘u da loinei: ‘Oio ‘ebeloina iauiaudi ‘u da ‘ewedi ta ‘enega.