Salamo 81 - Buki Tabu Lowaenei 1919

SALAMO 81.

¹ Eaubada ‘idi waiwai ‘ena wa da wari toila: Guausoara ‘enana wa da iagei Iakobo ‘ina Eaubada ‘enaia.

² Salamo wa da ‘ewena, ta binobino‘o wa da me‘ei, Api ‘ana nono bobo‘ana laire ma‘ieana.

³ Nawarae auauna ‘enega ioguli wa da mu‘e tu‘eie, Nawarae maibo‘ana ‘enaia, ‘ida sagari mwaumwau ‘enaia.

⁴ Tauna loina Iseraela manuna ta ‘enega, Iakobo ‘ina Eaubada ‘ina loina tomwana.

⁵ ‘I aseiena Iosepa ‘ena ‘ebe‘ita manuna, ‘Ena ‘asa Aigupito ‘ena ‘i tauia: Ona nigea ia mwaratonina ia nonona.

⁶ ‘A‘arana ia ‘ewena bwagilega: Nimanao si li‘amidi kodoega.

⁷ ‘Ate‘uia‘uia ‘ena ‘u bwau, ta ia ‘etoseemu; Weparara ‘ina esena kwaia ‘enega ia ona limana ‘emuia; Boasi Meriba ‘edia ia tooio. (Sela.)

⁸ ‘Igu tomota ie, wa da nono, ta ia da e‘ita ‘emuia; Iseraela ie, ‘abo ‘eguia ‘u da nono!

⁹ Gea‘abo ‘e bweu eaubada dumadumana ‘emuia ‘i da miami; Ta gea‘abo ‘e bweu eaubada dumadumana ‘ena ‘u da bwagobwago.

¹⁰ ‘Abo‘agu Ieoba ‘imu Eaubada, Taugu ia ‘au‘ewemu ‘asa Aigupitoega: ‘Awaio ‘u da ebari sinabwana, ta ia da loemaena.

¹¹ Ta ‘igu tomota ‘enagu nigea si nonona; Ta Iseraela si guitoasegu.

¹² Ta ‘enega ia tagwaredi ‘atedi ‘idi pa‘arina ‘enaia, Be ‘enega taudi ‘idi nuanua ‘edia si da tautauia.

¹³ ‘Igu tomota ‘eguma ‘eguia si da nono, Iseraela eguma ‘igu ‘eda ‘edia si da tautauia!

¹⁴ Manini ‘adi to losaiao ia da didigedi, Ta nimagu ia da ‘ilena ‘adi tarauwarao ‘edia.

¹⁵ Taudi nuadi ‘i to‘umali Ieoba ‘enaia, matanaia si da e‘enoidi: Ta ‘idi tuta ‘i da mia ataia.

¹⁶ Witi bobo‘ai‘ailina wate ‘enega ‘i da e‘enidi: Ta mu‘awa gurewega ‘enega ia da etonaatoaeio.