Salamo 80 - Buki Tabu Lowaenei 1919

SALAMO 80.

¹ Iseraela ‘ina To‐‘ita‘i‘ita‐sipi ie, ‘O io Iosepa u ‘au‘ewena sipi ‘ana iau ‘atua; ‘O io tierubima ‘edia ‘u toa, ‘u da saema.

² Eparaima be, Beniamina be, Manase be matadia, ‘imu waiwai ‘u da giniuiena, Ta ‘u da mai be ‘u da ‘etoseema.

³ Eaubada ie, ‘u da giesana‘ilema; Ta maniniio ‘u da giesae, be ‘a da bobo‘ana.

⁴ Boda ‘idi Ieoba Eaubada ie, Tuta ‘eisa ‘u da gamwasoara ‘imu tomota ‘idi sidasida ‘enaia?

⁵ Masura mataseruiao ‘ediega u ‘e‘enidi, Ta ‘u enumedi sinabwana mataseruiao ‘ediega.

⁶ ‘U bubuma ‘ebelosaia gosemao ‘edia; Ta ‘ama tarauwarao si edaedagi taudimo.

⁷ Boda ‘idi Eaubada ie, ‘u da giesana‘ilema; Ta maniniio ‘u da giesae, be ‘a da bobo‘ana.

⁸ ‘Oio oine ‘u me‘ena Aigupitoega: ‘Ebeloinao ‘u pa‘idi, ta ‘u asona.

⁹ ‘U bubu ‘ai‘ailina matanaia, Ta ramuna ‘i mwa‘uta, ta ‘asa ‘i loema‘ena.

¹⁰ Iauiaukwina ‘oeao ‘i lobodebodedi ‘enega, Ta narinao Eaubada ‘ina maruanao ‘atua.

¹¹ Narinao si saila lelewana ga oraia, Ta bwasilina Boasi‘awa ‘enaia.

¹² To‘ase manuna ‘ana ‘ariao ‘u wagedi, Be ‘enega iauiaudi si tautauia ‘edega si gitagena?

¹³ Saradona mitawega ‘i pe‘una, Ta mitawa ‘ina bosasaiao ‘ena si ‘e‘ai.

¹⁴ Bodao ‘idi Eaubada ie, ‘a sidesideio, ‘u da ‘ila limanama: Garewega ‘u da ‘ita mwa‘utama, ta ‘u da ‘ita, ta oine gete ‘ena ‘u da mai,

¹⁵ Wate ‘arena ‘ataio ni‘atu i ‘asona, Ta narina tauna ni‘atu ‘u giepa‘arina manuio tauio.

¹⁶ I ‘arasina, si ‘upwa mwa‘utena: Si saoora maniniio ‘ina ba‘e ‘enega.

¹⁷ Nimaio ‘i da miami ‘ataio ‘ana tai ‘enaia, Tai natuna ‘enaia tauna ‘u giepa‘ara manuio tauio.

¹⁸ Ta ‘enega gea‘abo ‘a da ‘ila‘ila ‘emuiega; ‘U da gieetapewama, ta ‘amu esana ‘ena ‘a da bwau.

¹⁹ Ieoba bodao ‘idi Eaubada, ‘u da gisana‘ilema; Maniniio ‘i da sae, ta ‘a da bobo‘ana.