Salamo 79 - Buki Tabu Lowaenei 1919

SALAMO 79.

¹ Eaubada ie, to apwesa ‘imu ‘asa ‘ena si ruguma; ‘Imu anua tabu ni‘atu si giebi‘ina; Ierusalema ni‘atu si sa‘uepopo‘ena.

² ‘Imu to‐guinuao bwaradi mwawamwawasidi ni‘atu si ‘ebwaea‘edi be garewa ‘idi manua ‘adi, ‘Imu to ‘esasena esiodi bare‘u ‘ina bomitawa ‘edia.

³ Raradi ni‘atu si siwena boasi ‘atua Ierusalema etaulunaia; Ta nigea ‘e bweu ‘i miami be ‘i siusiudi.

⁴ Ni‘atu ‘abo‘ada ‘ebeelia gosedao ‘edia, ‘Ebesinara ta ‘ebetuietuiea taudi si sakowasieda ‘edia.

⁵ Ieoba ie, tuta eisa ‘u da gamwasoara ataia? ‘Imu e‘ipi‘ipi ‘i da ‘arata awesabelulu ‘atua?

⁶ Toapwesa nigea si mwaramwaratoniio ‘edia ‘imu gamwasoara ‘u da siwa, Ta ‘ebeloinao nigea ‘amu esana ‘ena si bwaubwau ‘edia.

⁷ Iakobo si ‘enina ta ‘enega, Ta ‘ina ‘ebemia si losaoorina.

⁸ Tubumao ‘idi bubuna bokoboko gea‘abo ‘u da nuanua‘i‘isi manuma: ‘Imu nua‘ole‘ole nuadi si da nugana manini ‘emaia: Ni‘atu ‘a mwa‘uta wawasae ta ‘enega.

⁹ ‘Ama ‘etoseana ‘ina Eaubada ie, ‘u da lemema, ‘amu ‘esana ‘ina esaesa manuna: Ta ‘u da ‘etoseema, ta ‘ima loegesiao ‘u da ‘utu iaulei, ‘amu esana leleana.

¹⁰ To‘ase manuna to apwesa si da gwae, ‘Idi Eaubada mane? ‘Imu toguinuao raradi ni‘atu si siwena ‘ana e‘isa To apwesa si da mwaratoni matamaia.

¹¹ Ioniionina ‘ina eiawasilagalaga ‘i da mai matamuia; Na‘ieana ‘imu waiwai ‘ana sinabwa mwawasa natunao ‘u da ‘ita‘i‘isidi;

¹² Ta gosemao ‘edia ‘u da giesebeni lumalumadi ‘enaia ‘Idi elia, ‘enega si eliemu, ‘Inapwana ie.

¹³ Ta ‘enega ‘abo‘ama ‘imu tomota ta ‘imu nedu ‘ina sipiao ‘Emuia ‘a da lokagutoki ataia: ‘Amu tuputupu ‘a da e‘ita epatatomota iauiauna ‘edia.