Salamo 78 - Buki Tabu Lowaenei 1919

SALAMO 78.

¹ ‘Igu tomota ie, ‘igu e‘ita‘ita ‘ena wa da nono: ‘Awagu ‘ina onao tenami ‘edia wa da tagware.

² ‘Awagu ia da ‘ebari onasemalimaliega; Ona guguioi lowaeneiega ia da ‘inanedi:

³ Taudi ni‘atu ta nonodi ga ta sinapudi, Ta tamadao ni‘atu si simana ‘edaia.

⁴ Gea‘abo ta sa‘usa‘u kwaiedi natudiao ‘ediega, ‘Epata‐tomota ‘i memai ‘ena Ieoba ‘ana tuputupu ta da simana ‘edia, ‘Ina waiwai ta, ‘ina guinua to sinabwa sadi ga taudi ni‘atu ‘i bubudi ta.

⁵ ‘Ebee‘ita ‘i sa‘uiaina Iakobo ‘ena ta ‘enega, Ta loina ‘i aseiena Iseraela ‘enaia, Tauna tubudao ‘edia ‘i oneone, Be si da e‘ita‘edi natudiao ‘edia:

⁶ Be ‘enega epata‐tomota ‘i memai si da mwaratoni, tuga gogama si da tubua; Taudi si da tooro be natudiao ‘edia si da simana:

⁷ Be ‘enega ‘idi nuaiaina si da sa‘u Eaubada ‘ena, Ta gea‘abo Eaubada ‘ina guinuao si da nuapupuredi, Ta ‘ina onao si da ‘itai‘isidi:

⁸ Ta gea‘abo si da nadigega tubudiao, Epata‐tomota nuapa‘ara ta loguitoasa; Epata‐tomota ‘atedi nigea si sa‘usa‘u‘ai‘aili, Ta iaruiaruadi nigea ‘i miamia pa‘ara Eaubada ma‘ieana.

⁹ Eparaima natunao, ma‘idi ‘ebelosaia ta tupu si ‘a‘aridi, Saia ‘ana asiata ‘enega si ‘ila‘ila.

¹⁰ Eaubada ‘ina ona‘upa‘upa nigea si giiai‘i‘isi, Ta ‘ina loina geanuadi ‘ena si da tauia;

¹¹ Ta ‘ina bubunao si nuapupuredi, Ta ‘ina guinua to sinabwa sadi taudi ni‘atu ‘i e‘ita ‘edia.

¹² Iage to sinabwa sadi ‘i guinuedi tamadiao matadia, ‘Asa Aigupito ‘ena, Soana mitawina ‘enaia.

¹³ Ora i ‘upwa‐ruena, ta ‘i loinedi ga si rubwarena; Ta ora nidi ‘i gietoorodi sa‘uepopo ‘atua.

¹⁴ Asiataia wate i ‘au‘ewedi poanega, Ta boiboia maibo‘ana awe ‘ina ma‘edanega.

¹⁵ Gurewa ‘i giwearina mitawaia, Ta ‘i enumedi sinabwana ‘atua ni‘uiega.

¹⁶ Boasi daudaudi wate ‘i me‘edi gurewa ‘ediega, Ta boasiao ‘i edau mwa‘utedi boasi‘awadi sinabwadi nadigega.

¹⁷ Ta si gewagewana tuga ta si bubuna to‘umalina ‘enaia, To Lo‘etana Sana ‘ena guaudi ‘i toiasa mitawaia.

¹⁸ Ta Eaubada si toona ‘atedia, Esio si sidena ‘idi iarakwaiena manuna.

¹⁹ Tamo, Eaubada ‘ena si gwaegwae; Si ona, Kapekapeana nai Eaubada tebeli ‘i da sa‘u mitawaia?

²⁰ Wa ‘ita, gurewa ‘i sapina, ga boasi si dau toilama, Ta boasi daudaudi si emurua; Kapekapeana nai palaua wate ‘i da ‘ebwaea? Esio ‘i da sa‘u nai ‘ina tomota manudi?

²¹ Ta ‘enega Ieoba ‘i nonona, ta ‘i gamwasoara: Ta awe si loe‘abina Iakobo ‘enaia, Ta gamwasoara ‘i tu‘e Iseraela ‘enaia;

²² Eaubada nigea ‘ena si iareiare ta ‘enega, Ta ‘ina ‘etoseana nigea ‘ena si ‘emisa.

²³ Ta mwatui ‘etanaia ‘i eonena tuga, Ta garewa ‘ana ‘auboda ‘i egigegedi;

²⁴ Ta mana ‘i giesagunama ‘edia be si da ‘e‘ai, Ta garewa witina ‘enega i ‘ebwaedi.

²⁵ Tai to ewaiwai ‘ina palaua ‘enega i ‘e‘ai: Masura maamaana ‘i etunenama ‘edia.

²⁶ Bomatu i ‘au‘ewena be ‘i toatoa garewaia: Ta ‘ina waiwaiega iarasi ‘i nuganena.

²⁷ Esio ‘i giesagunama wate ‘edia kau ‘atua, Ta manua mapapena ‘atua ora kaukauna:

²⁸ Ta ‘i pela mwa‘utena ‘idi ‘ebemia gamwagamwaninaia, ‘Idi anua ‘i sakowasiena.

²⁹ Ta ‘enega si ‘e‘ai, ga gamwadi ‘i pawa; Ta iage si iaraiarakwaiena i ‘ebwaedi.

³⁰ ‘Idi iarakwaia nigea si guiguitoase, ‘Adi masura ‘awadi ‘edia ‘i miami tuga,

³¹ Ga Eaubada ‘ina gamwasoara ‘i tu‘e ‘edia, Ta iapaiapa wawasaedi ‘edia ‘i loemwawasidi, Ta Iseraela ‘ana tubuauiao ‘i unu mwa‘utedi.

³² Ta iage iauiauna gete ‘i apwesa ta tuga si loegesi, Ta ‘ina guinua to sinabwa sadi nigea si iareiaredi.

³³ Ta ‘enega ‘idi asiata ‘i loegumwaridi bubuna besobeso ‘enaia, Ta ‘idi iakwarao didiga ‘enaia.

³⁴ ‘Ena ‘i unudi, ga si ‘enaidena: Ta si ‘ila ta Eaubada si ‘ebesa manini‘ena.

³⁵ Ta si nua‘i‘isina ‘aene Eaubada ‘idi gurewa, Ta Eaubada To Lo‘Etana ‘adi to ‘au‘ewa lima.

³⁶ Ta ‘awadiega ‘ena si ona dibidibi, Ta meiadiega ‘ena si ona kabokabo.

³⁷ ‘Atedi nigea ‘i paruparu ma‘ieana ta ‘enega, Ta nigea si mia ‘ai‘aila ‘ina ona‘upa‘upa ‘enaia.

³⁸ Ta tauna, ‘i maa nua‘ole‘oleiega, ga ‘idi bubuna bokobokona nigea ‘i e‘isa, ta nigea ‘i loesaooridi; Tamo, tuta iauna ‘ina gamwasoara i ‘ile‘ile, Ta ‘ina gamwasoara iauiauna nigea ‘i iliili.

³⁹ Ta ‘i nua‘i‘ita ‘aene si ‘eesiomo; Iagila ‘i sawara, ta nigea i ‘ila‘ilama.

⁴⁰ Tuta iauiauna ‘ena si loguitoasa mitawaia, Ta ‘ina dedo si sa‘una esena kaukaudaisinamo ‘enaia!

⁴¹ Ta si ‘ila limana ta Eaubada si too, Ta Iseraela ‘ina Tabu Tebweuna si eiabena.

⁴² Nimana nigea si nuanua‘i‘isi, Nai asiata nina ‘enega tarauwara ‘enega i ‘ewa‘ewalimedi.

⁴³ ‘Ina we‘iwe‘iiaia ‘i sa‘udi Aigupito ‘ena, Ta ‘ina guinua ‘ebenuaowana Soana ‘ina baguraia;

⁴⁴ Ta ‘idi boasi‘awadiao ‘i gibunidi ga si erara, Ta ‘idi boasi daudaudi, be ‘enega gea‘abo si da numanuma.

⁴⁵ Nenewara ‘eiauna ‘i etunedi ‘edia, taudi si ‘enidi; Ta kwekweiao, taudi si loesaooridi:

⁴⁶ ‘Idi iageao i ‘elosinabwa wate didimwana i ‘ebwa‘ena, Ta ‘idi guinua bilolo ‘enaia.

⁴⁷ ‘Adi oine ‘i loesaooridi ‘usanapatunega, Ta ‘idi kaiwe sikomoa gaguna patupatuna ‘enega.

⁴⁸ ‘Idi bulomakau wate ‘i tagwaredi ‘usana patuna ‘enaia, Ta ‘idi sipi iau namara ‘ina ‘ebeunua iaiiai ‘edia.

⁴⁹ ‘Ina gamwasoara dididiga i ‘ulena ‘edia, Egamwagamwagu, nuaiaiiai be, ‘ebeloniu be, To‘umalina ‘ina anelose ma‘adi boda.

⁵⁰ ‘Eda ‘i bubuna ‘ina gamwasoara manuna: Iaruiaruadi nigea ‘i egagare mwawasega, Ta iawasidi ‘i tagwarena muia ‘enaia;

⁵¹ Ta tomatua iauiaudi ‘i unudi Aigupito ‘ena, ‘Idi waiwai ‘arena Ama ‘ina anua ‘edia:

⁵² Ta tauna ‘ina tomota i ‘au‘ewedi sipi nadigega, Ta ‘i nuganedi mitawaia iau ‘atua.

⁵³ Ta i ‘au‘ewedi bobo‘ana, ta ‘enega nigea si da matauta: Ta ‘adi tarauwarao ora ‘i siwa tautaudi.

⁵⁴ Ta ‘ina anua tabu tupitupina ‘ena ‘i me‘edi, ‘Oea gete ‘ena, tauna ataina ‘i lagwena.

⁵⁵ ‘Ebeloinao wate ‘i pa‘idi matadia, Ta i ‘eguiai‘edi ‘ebe‘ewa manuna rabega, Ta Iseraela ‘idi susu ‘i loinedi be ‘idi anua ‘edia si da miami.

⁵⁶ Ta Eaubada To Lo‘etana Sana si toona tuga ta ‘ena si loguitoasa, Ta ‘ina e‘itao nigea si giiagiiai‘i‘isi;

⁵⁷ Ta si sana‘ila tuga, ta si bubuna kakokabo tubudiao nadigega; Si tauia gesi ‘atua tupu kabokabo.

⁵⁸ Si ‘eiabena be ‘i da gamwasoara ta ‘enega ‘idi esena lo‘etanidi ‘ediega, Ta ‘ana e‘ipi‘ipi si sa‘una ‘idi tokwarui daiadaiagidi ‘ediega.

⁵⁹ Eaubada ni‘atu ‘i nonona, ga ‘i gamwasoara, Ta Iseraela ‘i guitoasena sinabwana;

⁶⁰ Ta ‘enega Silo ‘ina anua‐tabenakele ‘i e‘idi‘idiena, Anua nina ‘i sa‘una tai gamwagamwanidia:

⁶¹ Ta ‘ina waiwai ‘i tagwarena iona ‘enaia, Ta ‘ina esaesa tarauwara nimanaia.

⁶² ‘Ina tomota wate ‘i tagwaredi sisi‐saia ‘enaia; Ta ‘i gamwasoara ‘ina ‘asa ‘enaia.

⁶³ Awesabelulu tubuau i ‘enidi; Ta ‘idi gomagweineao nigea ma‘idi ai ‘ana wari.

⁶⁴ ‘Idi to tariao si be‘u sisi‐saiega; Ta ‘idi kwaburao nigea si ‘ewa‘ewabamu.

⁶⁵ Ga ‘Inapwana ‘i losuia‘ena ‘atua ‘e bweu ‘eno‘enoega, ‘Atua tai waiwai ‘i bwau oine manuna.

⁶⁶ Ta ‘ana tarauwarao ‘i unu‘iledi: ‘Adi omaiamaia ‘ataia ‘i sa‘una.

⁶⁷ Wate Iosepa ‘ina anua ‘i guitoasena, Ta susu Eparaima nigea i ‘ita‘i‘ita‘esiesinue;

⁶⁸ Ta susu Iuda i ‘ita‘esi‘esinuena, ‘Oea Siona tauna ‘i obobomena.

⁶⁹ Ta anua tabu i ‘abina esena ‘etosoradi ‘atua, Bare‘u ‘atua tauna ‘i giepa‘ara ataena.

⁷⁰ Dabida wate i ‘ita‘esi‘esinuena ‘ina to‐guinua, Ta sipi ‘adi ‘ari ‘ediega i ‘ewena:

⁷¹ Sipi sinadiao esusudi ‘i murimuri‘edi ‘enega i ‘au‘ewenama, Be ‘ina tomota Iakobo, ta ‘ina ‘asa Iseraela ‘i da ‘e‘enidi.

⁷² Ta‘ enega i ‘e‘enidi ‘ina ‘atebobo‘ai‘ailina na‘ieana; Ta ‘i nuganedi nimana ‘idi sinasinapu ‘enega.