Salamo 77 - Buki Tabu Lowaenei 1919

SALAMO 77.

¹ Eaubada ‘ena ia da bwau ‘enaguiega; Tuga Eaubada ‘enaia ‘enaguiega, ta ‘eguia ‘i da nono.

² ‘Igu loniu ‘ina asiata ‘enega ‘Inapwana ia ‘ebese: Nimagu ‘i mia iasitoto boiboia, ta nigea ‘i kokokoma; Iaruiaruagu geanuana si da gieguausoarina.

³ Eaubada ia nuena, ta nigea ia miamia oonua: Ia olilisana, ta iaruiaruagu ‘i tabataba. (Sela.)

⁴ Matagu ‘idi dunedune ‘u gi‐iaina: Ia loniu ga ‘enega nigea kapekapeana ia onaona.

⁵ Asiata lowaenei ni‘atu ia nuedi, Gimi tutadi ‘adi iakwarao.

⁶ ‘Igu wari boiboi ia enua‘i‘isina: ‘Ategu taugu ‘enega ia nuanua; Ta iaruiaruagu i ‘ebesa ‘ai‘aila.

⁷ ‘Inapwana ‘i da ‘ula iaula ataena nai? Ta gea‘abo wate nuana ‘i da bobo‘ana limana nai?

⁸ ‘Ina nua‘ole‘ole ni‘atu nai ‘i tauia ataia? ‘Ina ona‘upa‘upa ‘i loeiarara ataena nai?

⁹ Eaubada ni‘atu nua‘ole‘ole ‘i nuapupurena? ‘Ina nua‘ole‘ole nuadi ni‘atu nai ‘i gibodedi gamwasoarega? (Sela.)

¹⁰ Ta ia gwae, Gete ‘igu neneta; Ta To Lo‘etana Sana ‘ataina ‘ana iakwarao ia da nua‘i‘isidi.

¹¹ Ieoba ‘ina guinuao ia da ‘inanedi; ‘Imu guinuao ‘ebenuaowana lowaeneiega ia da nua‘i‘isidi ta ‘enega.

¹² ‘Imu guinua maibo‘ana wate manuna ia da nuanua, Ta ‘imu bubunao ia da nua edaedadamidi.

¹³ Eaubada ie, ‘imu ‘eda anua tabu ‘enaia: Iaita eaubada sinabwana Eaubada nadigega?

¹⁴ ‘Oio tauio Eaubada nina iage ‘ebenuaowana ‘u guinuedi: ‘Imu pa‘arina ni‘atu ‘u e‘ita‘ena tomota gamwagamwanidia.

¹⁵ Nimamuiega ni‘atu ‘imu tomota u ‘ewa limedi, Iakobo ta Iosepa natudiao. (Sela.)

¹⁶ Eaubada ie, boasiao si ‘itemu: Boasiao si ‘itemu, si matauta: Ni‘u wate ‘i dedera.

¹⁷ Poana boasi si siwena; Garewa dagudagugudi si gieapwesedi: ‘Imu gita wate si ‘elelewana dadana.

¹⁸ ‘Imu weparara ‘enana bwawabwawa ‘ena ‘i miami; Namara gabura ‘i giema‘edanena: Bare‘u ‘i dedera ta ‘i loniu.

¹⁹ ‘Imu ‘eda oraia ‘i miami, Ta ‘imu ‘edao boasi sinabwadi ‘edia, Ta ‘imu sa‘ulaga nigea si mwaratonidi.

²⁰ ‘Imu tomota u ‘au‘ewedi iau ‘atua, Mose ta Aarona nimadiega.