Salamo 76 - Buki Tabu Lowaenei 1919

SALAMO 76.

¹ Iuda ‘ena Eaubada si mwaratonina: ‘Ana esana sinabwana Iseraela ‘enaia.

² Wate Salema ‘ena ‘ina tabenakele ‘i miami, Ta ‘ina ‘ebemia Siona ‘enaia.

³ Gote ‘ena tupu ‘ana gitao ‘i lasedi, Lawa be, sisi saia be, saia be. (Sela.)

⁴ ‘Oio ‘u esaesa ta bobo‘ai‘ailiio, iage ‘oae ‘ana ‘oeao ‘ediega.

⁵ To ‘atepatu ni‘atu si saoora, ‘idi ‘enomwataia ni‘atu si ‘eno‘eno; Ta tai waiwaidi nigea ‘e bweu ‘ediega nimadi si lobaloba.

⁶ Iakobo ‘ina Eaubada ie, ‘imu ba‘e ‘enega, Saliote ta ose ruarua si ‘eno ‘atua mwawasa.

⁷ ‘Oio, tuga ‘oio, si matautemu: Ta iaita ‘i da tooro matamuia ‘ena ‘u gamwasoara ma‘ebweuna?

⁸ ‘Oio ‘u ona be loina si nonona garewega; Bare‘u ‘i matauta, ta i ‘emwa‘ule,

⁹ ‘Ena Eaubada ‘i tooro sabi loina, Be bare‘u ‘ina to oonua iauiaudi ‘i da ‘etoseedi. (Sela.)

¹⁰ Ona ‘ai‘aila tai ‘ina gamwasoara ‘i da tupuio: Gamwasoara tupwana ‘u da logadiwane ‘emuia.

¹¹ Wa da ona‘upa‘upa, ta wa da e‘isa Ieoba ‘imi Eaubada ‘enaia: Tauna sawesawenaia si da matautena iauiaudi si miamia sakowasiena ‘ebwae‐adaita ‘ena si da me‘edi.

¹² ‘Inapwanao iaruiaruadi ‘i da ‘upwaiaulei: Tauna ‘i didiga bare‘u ‘ina kiniao ‘edia.