Salamo 75 - Buki Tabu Lowaenei 1919

SALAMO 75.

¹ Eaubada ie, ‘emuia ‘a lokagutoki; ‘A lokagutoki, ‘amu esana serabemaia ta ‘enega: Tai ‘imu guinuao ‘ebenua‘owana si simanedi.

² ‘Ena tuta ‘ai‘aila ia da loba, Ia da loina paruparuna.

³ Bare‘u ta ‘ana tomianao iauiaudi ni‘atu si sawara; ‘Ina ‘orao ni‘atu ia sa‘u tu‘eiedi. (Sela.)

⁴ To gagasa ‘edia ia gwae, Gea‘abo wa da bubuna gagasa; Ta to to‘umalidi ‘edia, Gea‘abo ‘imi ioguli wa sanasanatu‘e.

⁵ ‘Imi ioguli gea‘abo wa da ‘e‘etotu‘eie; Gea‘abo wa gwaegwae ma‘imi ‘otopa‘ara.

⁶ Nigea bomatuiega, nai ‘ebwagega, Nai mitawega gitu‘e ‘i memai ta ‘enega.

⁷ Eaubada tauna to loina: ‘E bweu ‘i sa‘u mwa‘utena, ta ‘e bweu ‘i gitu‘eiena.

⁸ Ieoba nimanaia keiga ‘i miami ta ‘enega, ta oine ‘i busobuso; ‘I maa ‘ili‘ilinega, ta iage nina tauna ‘i siwena: Ona ‘ai‘aila pwapwalina, bare‘u ‘ina to‘uto‘umaliao iauiaudi si da bibi, be si da numa.

⁹ Ta ia da simana ataia, Ia da wari tuputupu Iakobo ‘ina Eaubada ‘enaia.

¹⁰ Wate to to‘umalidi ‘idi ioguli iauiauna ia da e‘upwa iaule; Ta to‐bubu‐paruparu ‘idi ioguli ia da gitu‘eie.