Salamo 74 - Buki Tabu Lowaenei 1919

SALAMO 74.

¹ Eaubada ie, to‘ase manuna u ‘ula iaula ataema? To‘ase manuna ‘imu gamwasoara i ‘asu‘asu ‘imu pwatura ‘ina sipiao ‘edia?

² ‘Imu boda ‘u da nua‘i‘isi, tauna lowaeneiega ‘u lagwena, Tauna u ‘ewalimena be ‘amu ‘egu‘eguiai ‘ana susu; Ta ‘oea Siona, ‘ena ni‘atu ‘u miami.

³ ‘Aeio ‘u da gilagasi saoora ataia ‘edia, To‘umalina iauiauna tarauwara ni‘atu ‘i guinuena anua tabu ‘enaia.

⁴ ‘Amu tarauwarao ni‘atu si bwau toila ‘imu egogona gamwagamwanaia; ‘Idi doe si sa‘u tu‘eiedi we‘iwe‘iiaia manudi.

⁵ Taudi ‘atua tai ‘ila si gilagasidi Kaiwe o ‘ai ‘enaia.

⁶ Ta gete ‘ina guinua daiadaiagina iauiauna rererea Si ‘auweara mwa‘utena kunuwai ta ‘ila ‘ediega.

⁷ ‘Imu anua tabu ni‘atu si loe‘abina; ‘Amu esana ‘ina ‘ebemia ni‘atu si gibesobeso ga bare‘uia.

⁸ ‘Atedia si gwaegwae, Ta da loesawaridi maibo‘adi: Eaubada ‘ina anua ‘ebederiegogona ni‘atu si gabudi.

⁹ ‘Ida we‘iwe‘iiaia nigea ta ‘itedi: Nigea wate ‘e bweu paropita ‘i miami; Ta nigea ‘e bweu gamwagamwanidaia ‘i mwaramwaratoni ‘ana tuta.

¹⁰ Eaubada ie, tuta eisa tarauwara ‘i da ba‘e? Tarauwara ‘amu esana ‘i da ‘inana besobeso ataia?

¹¹ To‘ase manuna nimaio ‘u lisi ‘ilena, tuga ataio? Lumalumaio ‘enega ‘u da lisina be ‘u da loegumwaridi.

¹² Ta Eaubada ‘igu King lowaeneiega, ‘Etoseana ‘i guiguinue bare‘u gamwanaia.

¹³ Ora ‘u wearina ‘imu waiwaiega: Warigoa debadi u ‘e‘auwearidi boasi ‘edia.

¹⁴ Rabarabaoo debanao u ‘e‘auweara lelewane, U ‘ebwaea‘ena ga ‘i emasura tomota to mia mitawaia ‘edia.

¹⁵ Wewerupwa ta murua ‘u wearidi: Boasi ‘awa waiwaidi ‘u gieiapasidi.

¹⁶ Asiata ‘imu iage, boiboi wate ‘imu iage: Ma‘edana ta sinara ni‘atu ‘u sa‘u ‘ai‘ailidi.

¹⁷ Bare‘u ‘ana raba iauiauna ni‘atu ‘u sa‘udi: Nawarae iaiiai ta nawarae gogai ‘u bubudi.

¹⁸ Ieoba ie, gete ‘u da nua‘i‘isi, tarauwara ni‘atu si elia, Ta tomota ‘euwauwadi ‘amu esana si ‘inana besobesona.

¹⁹ ‘Imu bunetutu iaruiaruana gea‘abo ‘u da ‘ebwa‘ebwaeae bomitawa ‘enaia: ‘Imu gomabeso iawasidi gea‘abo ‘u nuapupura ataedi.

²⁰ Ona ‘upa‘upa ‘u da ‘amaiabena: Bareu ‘ina esenao guguioi si maa didiga ‘ina ‘ebemia ‘ediega ta ‘enega.

²¹ Taudi to mia mwaumwau gea‘abo si da ‘ilama ma‘idi omaiamaia: Gomabeso ta nanaewadi ‘amu esana si da tupuna.

²² Eaubada ie, ‘u da tooro, tauio ‘imu iage manuna ‘u da ona etara: ‘U da nua‘i‘isi tai euwauwa ‘ina ba‘emu asiata maibo‘ana.

²³ ‘Amu tarauwarao ‘enadi gea‘abo ‘u da nuanuapupura: Taudi si tooro matamuia ‘idi toitoila ‘i tu‘e ataia.