Salamo 73 - Buki Tabu Lowaenei 1919

SALAMO 73.

¹ Eaubada tebweuna ‘i bobo‘ana Iseraela ‘enaia, Tuga taudi nadigega ‘atedi i ‘esasena.

² Ta manugu, ‘aegu ‘i abe si gugumwara; ‘Igu sa‘ulagao ‘i abe si newanewa.

³ To gagasa manudi ia e‘ipi‘ipi ta ‘enega, ‘Ena to to‘umalidi ‘idi miabobo‘ana ia ‘itena.

⁴ Nigea ‘e bweu ‘idi elo‘uia ‘idi mwawasa ‘ena ta ‘enega: Ta ‘idi waiwai ‘i pa‘ara.

⁵ Tai ‘idi mia geiogeioi nigea ‘ena si miami; Ta nigea si elo‘uia mari tai nadigega.

⁶ Ta ‘enega gagasa ‘atua aupa ‘otodi ‘ena; Didiga ‘i bodedi tara‘apwara ‘atua.

⁷ Matadi si dunedune iapega: ‘Atedi ‘idi nuanua ‘i maa‘apu‘apu.

⁸ Si tuietuiea, ta bubuna to‘umalina ‘enega didiga si ‘ina‘inana: Si onaona ‘etanega.

⁹ ‘Awadi si sa‘una garewaia, Ta meiadi bare‘u ‘i iabwarena.

¹⁰ Ta ‘enega ‘ina tomota si ‘ilama gete ‘ena: Ta boasi makeigana maamaana si bibina.

¹¹ Ta si gwae, Mwa‘adega Eaubada ‘i mwaramwaratoni? Ta sinasinapu ‘i miami nai To ‘Etana sana ‘enaia?

¹² Wa ‘ita, taudi gete to to‘umalidi; Ta, si eiawai‘ata ataia, ga ‘adi oesi si sinabwa.

¹³ Ona ‘ai‘aila ‘ategu ni‘atu ia giesasa besobesona, Ta nimagu ia lo‘utuna bubuna nigea loegesiega;

¹⁴ Asiata maibo‘ana si ‘eiabegu ta ‘enega, Ta ‘agu sapi ia lobena gonagona iauna.

¹⁵ ‘Abo ia gwae, Ia da ona nadigega; U ‘ita, natumuao ‘idi epata‐tomota ‘enega ni‘atu ia bubuna kabokabo ‘edia.

¹⁶ ‘Ena ia nuena mwa‘adega gete ia da mwaratoni, ‘I elo‘uia wawasae ‘eguia;

¹⁷ Ga tuta nina Eaubada ‘ina anua tabu ‘ena ia rugu, Ta ‘idi ‘ebelosaroni muriega ia nuena.

¹⁸ Ona ‘ai‘aila esena newanewadi ‘edia ‘u sa‘udi: ‘U ulamwa‘utedi saoora ‘enaia.

¹⁹ Tuta tomwana ‘e bweuna enega ni‘atu si waborebore! Si gumwara ‘ai‘aila ‘ebedidiga ‘ediega.

²⁰ ‘Atua madawara ‘ena ‘e bweu ‘i tooro: Nadigega, Ieoba ie, ‘ena ‘u tooro, ma‘ama‘aiaudi ‘u da sinarina.

²¹ ‘Ategu‘i loniu ta ‘enega, Ta tolobwagu si badina:

²² ‘Abo‘agu ‘atua bomitawa, ta mwagemwagegu; ‘Abo‘agu ‘atua iobai matamuia.

²³ Ta ia mia ataia ma‘ieaio: ‘Ataigu ni‘atu ‘u giiaina.

²⁴ ‘Imu nuanua ‘enega ‘u da nuganegu, Ta muriega esaesa ‘ena ‘u da ‘au‘ewegu.

²⁵ ‘Abo‘agu ‘iaita wate ‘eguia garewaia, tebweuio? Ta nigea ‘e bweu bare‘uia nuagu i ‘ewa‘ewa tebweuio.

²⁶ Esiogu ta ‘ategu si tabataba: Ta Eaubada tauna ‘ategu ‘ina, gurewa ta ‘agu ‘egu‘eguiai ‘ataia.

²⁷ Wa ita, ta ‘enega, taudi ‘emuiega si miami ‘edasora si da saoora: Iauiaudi ‘emuiega si tautauia eiarakwaia ni‘atu ‘u loesawaridi.

²⁸ Ta ‘i bobo‘ana ‘eguia be ia da doro Eaubada deinaia: ‘Abo‘agu ‘Inapwana Eaubada ‘igu ‘ebedena, Be ‘enega ‘imu guinua iauiaudi ia da simanedi.