Salamo 72 - Buki Tabu Lowaenei 1919

SALAMO 72.

¹ Eaubada ie, ‘imu loinao king ‘ena ‘u da ‘ebwaea, Ta ‘imu bubuna paruparuna king natuna ‘enaia.

² ‘Imu tomota ‘i da loina bubuna paruparunega, Ta ‘imu gomabeso etaraiega.

³ ‘Oeao guguia si da me‘ena tomota ‘edia, Ta ‘oea gidaridi, bubuna paruparunega.

⁴ Tomota ‘idi gomabeso ‘i da loinei, Ta nanaewadi natudiao ‘i da ‘etoseedi, Ta to didiga ‘i da lelewanena.

⁵ Si da matauteio tuta ‘enega sinara ‘i miami, Ta nawarae matanaia, epata‐tomota iauiauna ‘edia.

⁶ ‘I da mwa‘utama ‘atua ‘usana nedu ‘upwa‘upwana ‘enaia: ‘Atua ‘usana matapwarapwara bare‘u si epwasena.

⁷ ‘Ina tutao to bubuna paruparu si da sinabwa; Ta guguia sinabwawawasae, ga nawarae nigea ‘i miami.

⁸ Ma‘ina loina wate ‘ora ga ora, Ta Boasi‘awanega ga bare‘u ‘ana ‘ebelosaroni.

⁹ Taudi mitawaia si miami matanaia si da bwago; Ta ‘ana tarauwarao kau si da loiamosi.

¹⁰ Tasisa ta saru ‘adi kiniao ‘ebwaeadaitao si da me‘edi: Sieba ta Seba ‘adi kiniao ‘ebwaeadaitao si da ‘ebwaeae.

¹¹ Tamo, king iauiauna matanaia si da be‘u: ‘Ebeloina iauiaudi ‘ena si da guinua.

¹² Nanaewana ‘i da ‘etoseena ‘ena ‘i dedoi; Ta gomabeso, tauna nigea ‘ana to lemamo.

¹³ Gomabeso ta nanaewadi ‘i da ‘atenua‘ole‘oleiedi, Ta nanaewadi iaruiaruadi ‘i da ‘etoseedi.

¹⁴ Mwaumwau ta didiga ‘ediega iaruiaruadi ‘i da ‘ewa limedi; Ta raradi ‘i da bobo‘ai‘ailina matanaia:

¹⁵ Ta si da bobo‘ana; ta Sieba ‘ina gola ‘enega si da ‘ebwaena: Ta tai si da sidasida ataia manuna; Asiata maibo‘ana si da ona obobomena.

¹⁶ Witi sinabwa wawasae bare‘uia ‘i da miami ‘oea debadia; Uana ‘i da dedera Lebanona ‘atua: Ta taudi to mia ‘asa si da sinabwa ‘atua bare‘u ‘ina nedu.

¹⁷ ‘Ana esana ‘i da mia ataia; ‘Ana esana ‘i da mia ataia sinara matanaia: Ta ‘ena tai si da bobo‘ana; ‘Ebeloina iauiauna si da ‘awa to‘eguausoarena.

¹⁸ Ieoba Eaubada ta da tupuna, Iseraela ‘ina Eaubada, Tauna tebweuna iage ‘ebenuaowana ‘i guinuedi:

¹⁹ Ta ‘ana esana esaesa ta da tupuna ataia; Ta bare‘u maibo‘ana ‘i da maa ‘ina esaesa ‘enega. Emeni ta Emeni.