Salamo 71 - Buki Tabu Lowaenei 1919

SALAMO 71.

¹ Ieoba ie, ‘emuia ia ‘emisa: Gea‘abo ‘u da tagwara be ‘e bweu tuta ia da omaiamaia.

² ‘Imu bubuna paruparuna ‘enega ‘u da ‘etolemegu, ta ‘u da ‘etoseegu: Tenaio ‘u da e‘etomwa‘utenama ‘eguia, ta ‘u da ‘etoseegu.

³ ‘Oio ‘u da ‘egurewa duruduruina ‘eguia, be ‘ena ia da dena ataia: Ni‘atu ‘u loina be si da ‘etoseegu; ‘Oio ‘igu gurewa ta ‘igu anua ‘ebelosaia.

⁴ Eaubada ie, to to‘umalina nimanega ‘u da ‘etoseegu, Tai gieogeioi ta nigea paruparuna nimanega.

⁵ ‘Inapwana Eaubada ie, ‘Oio ‘igu nuaiaina ta ‘enega: ‘Oio ‘igu ‘ebe‘emisa ‘igu tubuauiega.

⁶ ‘Oio ‘u giiaigu goama ‘ina ‘ebetubua ‘enega: ‘Oio sinagu dianega u ‘au‘ewegu: ‘Igu tuputupu manuio ataia.

⁷ ‘Abo‘agu ‘ebenuaowana iauiaudi ‘edia; Ta ‘oio ‘igu ‘ebedena waiwai.

⁸ ‘Awagu ‘i da maa ‘amu tuputupuiega, Ta ‘amu amaiabeiega asiata maibo‘ana.

⁹ Tuta ‘enega iawasigu ‘i dudurana gea‘abo ‘u da e‘idi‘idiegu; ‘Ena ‘igu waiwai ‘i gumwara gea‘abo ‘u da plilisinegu.

¹⁰ ‘Agu tarauwarao si onaona manugu ta ‘enega: Ta taudi iaruiaruagu manuna si mia iamwaiamwana si eonaona rererea,

¹¹ Si gwae, Eaubada ni‘atu ‘i e‘idi‘idiena: Wa da pili murinega be wa da ‘ewena; nigea ‘e bweu be ‘i da ‘etoseena ta ‘enega.

¹² Eaubada ie, gea‘abo ‘eguiega ‘u miamia edasora: ‘Igu Eaubada ie, ‘u da lomanini be ‘u da lemegu.

¹³ Taudi iaruiaruagu ‘ana tarauwarao si da omaiamaia ta si da egumwarena; Taudi ‘igu elo‘uia si ‘ebe‘ebesa ba‘e ta ‘ebesinara si da bodedi.

¹⁴ Ta ia da nuaiaina ataia, Ta ia da tupuio sinabwana ta sinabwa wawasae.

¹⁵ ‘Awagu ‘imu bubuna paruparuna ‘i da simane, Wate ‘imu ‘etoseana asiata maibo‘anega; ‘Ana sawa nigea ia mwaratoni ta ‘enega.

¹⁶ Ia da mai ‘Inapwana Ieoba ‘ina guinua waiwaiao ‘ediega: ‘Imu bubuna paruparuna ia da ‘inana, tuga ‘imu bubuna namo.

¹⁷ Eaubada ie, ‘igu tubuauiega ‘u e‘itegu; Ta tuta gote ga batua ‘imu guinua ‘ebenuaowana ni‘atu ia simanedi.

¹⁸ Tamo, Eaubada ie, ‘ena iawasigu ‘i dudurana ta uiauiagu ‘i segwa gea‘abo ‘u da e‘idi‘idiegu; Ga ‘imu pa‘arina ia da simane epata tomota ‘enaia, ‘Imu waiwai ‘ebweuna ‘e bweuna ‘i memai ‘enaia.

¹⁹ Eaubada ie, ‘imu bubuna paruparuna wate ‘i mia tu‘e wawasae; Ni‘atu iage sinabwadi ‘u guinuedi, Eaubada ie, iaita ‘oio nadigega?

²⁰ ‘Oio, ni‘atu elo‘uia iauna ta sinabwana ‘u e‘itema, ‘U da gietooro limema, Ta bare‘u ‘ina ni‘uega u ‘au‘ewatu‘elimema.

²¹ ‘Igu sinabwa ‘u da gisinabwa‘ena, Ta ‘u da sana‘ilama be ‘u da gieguausoaregu.

²² Wate ia da tupuio binobino‘oega, Tuga ‘imu ona‘ai‘aila, ‘igu Eaubada ie: ‘Emuia ia da wari tuputupu apiega, ‘Oio Iseraela ‘ina Tabu Tebweuna.

²³ Sopagu si da eguausoara sinabwana ‘ena ia wariwari tuputupu ‘emuia; Ta iaruiaruagu, tauna ni‘atu u ‘ewalimena.

²⁴ Meiagu wate ‘imu bubuna paruparuna manuna ‘i da gwaegwae asiata maibo‘anega: Taudi ‘igu elo‘uia si ‘ebesa, si omaiamaia ta ‘enega, si mia gieogeioi ta ‘enega.