Salamo 7 - Buki Tabu Lowaenei 1919

SALAMO 7.

¹ Ieoba ie ‘igu Eaubada, ‘emuia ia ‘emisa: Taudi si pa‘ipa‘igu ‘ediega ‘u da ‘etoseegu, ta ‘u da ‘au‘ewegu:

² ‘Abona nai iawasigu ‘i sabuna laioni ‘atua, ‘I da sabu lelewanena, tuta ‘enega nigea ‘ebweu ‘i da ‘etoseana.

³ Ieoba ie ‘igu Eaubada, ‘abo iage gete ni‘atu ia guinuena; ‘Abo bubuna bokobokona nimagu ‘edia ‘i miami;

⁴ ‘Abo tauna ma‘ieagu ‘a miamia guguia ga to‘umalina ia e‘isa ‘enaia; (Tamo, tauna ‘agu tarauwara daita ia da ‘etoseena:)

⁵ Iawasigu tarauwara ‘i da pili murinega, ta ‘i da ‘ewena; Tamo, iawasigu ‘i da ‘abilabila bare‘uia, Ta ‘igu esaesa ‘i da sa‘u kau ‘enaia. (Sela,)

⁶ ‘U da tooro, Ieoba ie, ‘imu gamwasoara ‘ena, ‘Agu tarauwarao ‘idi gamwasoara ‘edia ‘u da gietu‘eieio: Ta manugu ‘u da iaweiawe; ‘Oio loina ni‘atu ‘u oneone.

⁷ Ta tomota ‘idi egogona ‘i da miasakowasieio: Ta debadia ‘u da ‘ila ‘etanaia.

⁸ Ieoba loina ‘i guinuena tomotaiao ‘edia: Ieoba ie, ‘u da loinegu, na‘ieana ‘igu bubuna paruparuna, ta ‘igu bubuna ‘ai‘aila ‘eguia ‘i miami.

⁹ To to‘umalidi ‘idi to‘umalina ‘u da tagwara be ‘i da gumwara, ta to paruparudi ‘u da sa‘u pa‘aridi: Eaubada paruparuna nua‐magi ta ‘ate ‘i toodi.

¹⁰ ‘Igu lawa Eaubada ma‘ieana, Taudi ma‘idi bubuna ‘ai‘aila ‘atedia Tauna i ‘etoseedi.

¹¹ Eaubada i ‘e to‐loina bubuna paruparuna, Tamo, Eaubada ‘i gamwagamwasoara asiata iauna to to‘umalidi ‘edia.

¹² ‘Abo tai nigea i ‘ilama, ‘ina sisi‐saia ‘i da usi; ‘Ana tupu ni‘atu ‘i lisina, ta ‘i bubuna.

¹³ ‘Ebemwawasa wate ni‘atu ‘i bubuna manuna; ‘Ina gita ‘i bubudi ga si sabesabelulu.

¹⁴ Wa ‘ita, bubuna bokobokona ‘enega ‘i edadama; Tamo, wasegigi ni‘atu i ‘euwana ‘atenaia, ta ona kabokabo ni‘atu ‘i enatunena.

¹⁵ Gaula ni‘atu ‘i bubuna, ta ‘i salena, Ta siusiu dudurana ni‘atu ‘i bubuna ga ‘ena ‘i be‘u.

¹⁶ ‘Ina wasegigi ‘i da ‘ila tauna debanaia, Ta ‘ina gamwasoara ‘i da mwa‘uta deba‘ai‘ailina ‘enaia.

¹⁷ Ieoba, ‘ena ia da lokagutoki na‘ieana ‘ina bubuna paruparuna: Ta Ieoba To lo‘etana sana ‘esana ‘ena ia da wari tuputupu.