Salamo 69 - Buki Tabu Lowaenei 1919

SALAMO 69.

¹ Eaubada ie, ‘u da ‘etoseegu; Boasiao si ruguma iaruiaruagu ‘ena ta ‘enega.

² Ioioio ni‘uni‘una ‘ena ia darara, ‘ena nigea ‘e bweu ‘ebetooro: Ni‘atu ia mai boasi ni‘uni‘udi ‘edia, ‘ena murua si daubodebodegu.

³ Ia lo‘ame‘ame ‘igu dedoiega; tona‘agu ‘i iapasa; Matagu si ‘egumwara, tuta ia iamwaiamwa ‘igu Eaubada manuna.

⁴ Taudi si guitoasadaitegu ‘adi iau debagu uiauiana si pilisinena; Taudi nuanuadi si da ‘upwaiaulegu, ‘agu tarauwara geiogeioiao, si ewaiwai; Ga iage nigea ia ‘ewena ia ‘ebwaea‘ena.

⁵ Eaubada ie, ‘igu euwauwa ‘u mwaratonina; Ta ‘igu to‘umalinao nigea si miamiakwaia ‘emuiega.

⁶ Taudi ‘emuia si miamia iamwaiamwana gea‘abo si da omaiamaia manugu, ‘Oio boda ‘idi ‘Inapwana Eaubada: Taudi si ‘ebeseio gea‘abo si da sinaridi manugu, ‘Oio Iseraela ‘ina Eaubada.

⁷ Manuio si sinarigu ta ‘enega; Omaiamaia maninigu ‘i bodena.

⁸ ‘Abo‘agu ia eto‘u‘umara tasiguao ‘edia, Ta ia ‘e to apwesa sinagu natunao ‘edia.

⁹ ‘Imu anua ‘ina waiwai ni‘atu i ‘eegumwarigu ta enega; Ta taudi si ba‘eba‘emu ‘idi ba‘eao ‘eguia si be‘u.

¹⁰ ‘Ena ia dedoi, ta iaruiaruagu ia sapina edidigurega, Gote ‘agu sinara.

¹¹ ‘Ena ‘agu ‘oama ‘oama ‘oausa, ‘Abo‘agu ia eonasemalimali ‘edia.

¹² Taudi ‘ari ‘ana ‘awa ‘ena si miatoa manugu si gwaegwae; Ta ‘abo‘agu to numa bolausa ‘adi wari.

¹³ Ta manugu, ‘igu sidasida ‘emuia, Ieoba ie, tuta bobo‘ana ‘enega: Eaubada ie, ‘imu nua‘ole‘ole ‘ana iau ‘enega, ‘Eguia ‘u da ona limana ‘imu ‘etoseana ‘ina ona ‘ai‘aila ‘enega.

¹⁴ Sepwarega ‘u da ‘etoseegu, ta gea‘abo ‘u tagwatagwaregu be ia da daradarara: Taudi si guitoasegu ‘ediega ‘u da ‘etoseegu, ta boasi ni‘uni‘udi ‘ediega.

¹⁵ Murua gea‘abo ‘i da siwa uiosigu, Nai ni‘uia ‘i da niutaugu; Ta gaula gea‘abo ‘awana ‘i da ebode ‘eguia.

¹⁶ Ieoba ie, ‘eguia ‘u da ona limana; ‘imu oboboma nua‘ole‘ole ‘i bobo‘ana ta ‘enega: ‘Imu nua‘ole‘ole nuadi ‘adi iau na‘ieadi ‘u da sana‘ilama ‘eguia.

¹⁷ Maniniio gea‘abo ‘u da ekwaiena ‘imu ‘ari‘ei ‘enega; ‘Abo‘agu ia miamia to‘umalina; ‘u da ona limana manini ‘eguia.

¹⁸ Iaruiaruagu ‘ena ‘u da mai deinaia, ta ‘u da ‘ewa limena; ‘U da li‘amigu ‘agu tarauwarao manudi.

¹⁹ ‘Agu elia, ta ‘agu omaiamaia, ta ‘agu ‘ebesinara ‘u mwaratonidi; ‘Agu tarauwarao matamuia si miami iauiaudi.

²⁰ Elia ‘ategu ‘i pisarina; ta mwaumwauiega ia maa: Ta ‘aidi ia ‘ebesedi be si da ‘atenua‘ole‘oleegu, ta nigea ‘e bweu ‘i miami; Ta to oboboma manudi, ta nigea ‘e bweu ia lobaloba.

²¹ Wate darere si ‘ebwaegu ‘agu masura manuna; Ta tonaagu ‘i iapasa ga maiuiuiega si enumegu.

²² ‘Idi tebeli matadia ‘i da e sikwa; Ta ‘ena si mia guguia, ‘i da e suna.

²³ Matadi si da guguioi, be gea‘abo si da ‘ita‘ita; Ta tolobwadi ‘u da giededera ataia.

²⁴ ‘Imu gamwasoara ‘u da siwa ‘edia, Ta ‘imu egamwagamwagu didiga ‘i da pili be ‘i da ‘ewadi.

²⁵ ‘Idi ‘ebemia ‘i da waborebore; Gea‘abo ‘e bweu ‘idi anua ‘edia ‘i da miami.

²⁶ Tauna ‘u sapina si gieedeededona; Ta taudi ‘u unuunudi ‘idi elo‘uia si simanena.

²⁷ Bubuna to‘umalina ‘u da sa‘uepopoe ‘idi bubuna to‘umalina ‘enaia: Ta gea‘abo ‘imu bubuna paruparuna ‘ena si da ruguruguma.

²⁸ Iawasina ‘ana buki ‘enega si da kweu. Ta gea‘abo ‘adi esana si da ‘eto‘etoladi to bubuna paruparuna ma‘edi.

²⁹ Ta ‘abo‘agu ia gomabeso ta elo‘uia: Eaubada ie, ‘imu ‘etoseana ‘i da sa‘u tu‘eiegu.

³⁰ Eaubada ‘ana esana ia da tupuna wariega, Ta ia da ‘awasinabwa‘ena lokagutokiega.

³¹ Ta Ieoba ‘i da nuanuana wawasae bulomakau ‘enaia, Nai bulomakau masaranao ta ma‘ae‘edu‘edunao.

³² To oonua ni‘atu si ‘itena, ta si guausoara; ‘Omi Eaubada wa ‘ebesa, ‘atemi ‘i da etapewa.

³³ Ieoba gomabeso ‘i nonodi, Ta ‘ina ioniionidi nigea ‘i sinaridi.

³⁴ Garewa ta bare‘u si da tupuna, Ora, ta iage iauiauna ‘ena si miami.

³⁵ Eaubada Siona ‘i da ‘etoseena ta ‘enega, ta ‘asa Iuda ‘i da ‘abidi; Ta ‘ena si da miami, ta si da ‘ewena ‘idi ‘asa.

³⁶ ‘Ina ‘ari‘eiao tubudi wate si da ‘ewena ‘adi ‘egu‘eguia; Ta taudi ‘ana esana si obobomena ‘ena si da miami.