Salamo 68 - Buki Tabu Lowaenei 1919

SALAMO 68.

¹ Eaubada ‘i da tooro, ‘ana tarauwarao si da elelewana; Taudi wate si guitoasena si da dena matanega.

² Na‘ieana asu ‘i losawara, na‘ieana ‘u da giesawaridi: Na‘ieana iage patupatuna ‘i doga awe matanaia, Na‘ieana to to‘umalidi si da saoora Eaubada matanaia.

³ Ta to paruparuna si da guausoara; si da uiawana Eaubada matanaia: Tamo, si da ‘eguausoara uiwanega.

⁴ Eaubada ‘ena wa da wari, tuputupu wa da wari ‘ana esana ‘enaia: ‘Eda ‘ai‘aila wa da bubu tu‘e tauna ‘i gerugeru ta esena kaukaudaisinamo ‘i rubwaredi; ‘Ana esana Iaa; ta matanaia wa da uiawana.

⁵ Tamatamagenidi tamadi, ta kwabura ‘idi to loina, Tauna Eaubada ‘ina ‘ebemia tabu ‘enaia.

⁶ Eaubada to mia tebweudi ‘i sa‘udi susu ‘edia: Ioniionidi i ‘au‘ewedima mia bobo‘ana ‘enaia: Ta to loguitoasa bwa‘a ‘ubu‘ubura ‘ena si miami.

⁷ Eaubada ie, ‘ena ‘u apwesa ‘imu tomota matadia, ‘Ena mitawa ‘u rubwarena; (Sela.)

⁸ Bare‘u ‘i dedera, Garewaiao wate si mwa‘uta Eaubada matanaia: Sinai gote ‘i dedera tuga Eaubada matanaia, Iseraela ‘ina Eaubada.

⁹ ‘Oio Eaubada ie, ‘usana sinabwana ‘u etunena, ‘Amu ‘egu‘eguia ‘u giepa‘arina, ‘ena ‘i tabataba.

¹⁰ ‘Imu boda ‘ena si miami: ‘Oio, Eaubada ie, ‘imu bobo‘ana ‘enega ‘u sa‘una gomabeso manudi.

¹¹ ‘Inapwana ona i ‘ebwaea: Iine tetera nina si simanena si eboda sinabwana.

¹² Boda to losaia ‘idi kiniao si dena, si denadena: Ta tauna waine ‘asaia ‘i miamiana gwegwe si ‘oae‘oaedi i ‘eguiai‘ena.

¹³ Sipi ‘adi ‘ari gamwagamwanidia wa da ‘eno nai, ‘Atua bunetutu papenao si lobodebodena silebega, Ta dagurina gola rauraunega?

¹⁴ ‘Ena To Ewaiwaisana kiniao ‘i lelewanedi ‘enaia, Tuta nina na‘ieana ‘i esinou Salimona ‘enaia.

¹⁵ ‘Oea Basana tauna ‘oea Eaubada; ‘Oea Basana tauna ‘oea kesorana.

¹⁶ ‘Oea sinabwami, to‘ase manuna wa sana geba, ‘Oea tauna Eaubada ‘i nuanuana be ‘ina ‘ebemia ‘enaia? Tamo, Ieoba ‘ena ‘i da mia ataia.

¹⁷ Eaubada ‘ina saliote ‘e tweniti tausana, tuga tausanao ga tausanao: ‘Inapwana gamwagamwanidia, na‘ieana Sinai ‘enaia, anua tabu ‘enaia.

¹⁸ Ni‘atu ‘u tu‘e tabwanaia, ‘ebeiona ni‘atu u ‘au‘ewa ioniionina; Ni‘atu ‘ebwaeadaita u ‘ewedi tai gamwagamwanidia, Tamo, to loguitoasa wate ‘edia, be ‘enega Ieoba Eaubada ‘edia ‘i da miami.

¹⁹ Ieoba ta da tupuna, tauna ‘adi ‘a‘ara i ‘a‘arina asiata iauiauna, Tuga Eaubada tauna ‘ada ‘etoseana (Sela.)

²⁰ Eaubada ‘edaia ‘etoseanao ‘idi Eaubada; Ta Ieoba ‘Inapwana Tauna mwawasa ‘ina ‘ebeapwesaiao ‘ena si miami.

²¹ Ta Eaubada ‘ana tarauwarao debadi ‘i da ‘e‘aubware, Tauna Debana bwarana ma‘uia‘uiana nadigega ‘ina bubuna to‘umalina ‘ena ‘i tautauia ataia.

²² ‘Inapwana ‘i gwae, Basanega ia da ‘iledima, Ora ni‘uni‘unega ia da ‘iledima:

²³ Be ‘enega ‘aeio ‘u da giepwasena rarega, Be ‘imu kedewao meiadi ‘adi ‘egu‘eguia ‘i da ‘ewena ‘amu tarauwarao ‘ediega.

²⁴ Eaubada ie, ‘imu tautauia ni‘atu si ‘itedi, Tugama ‘igu Eaubada ‘ina tautauia, ‘Igu King, anua tabu ‘enaia.

²⁵ To wari si nugana, to binobino‘o si muria, Gomagweine timaberela si iageiage gamwagamwanidia.

²⁶ Eaubada wa da tupuna derie gogona ‘edia, Tuga ‘Inapwana, ‘omi Iseraela ‘ina boasi ‘apwa‘apwaiama ‘enega.

²⁷ Beniamina gidarina gote ‘idi to loina, Iuda ‘ina ‘inapwanao ta ‘idi boda, Sebulona ‘ina ‘inapwanao, Napatali ‘ina ‘inapwanao.

²⁸ ‘Imu Eaubada ‘imu pa‘arina ni‘atu ‘i loina: Eaubada ie, iage ni‘atu ‘u bubuna manuma ‘u da giepa‘ara.

²⁹ ‘Imu anua tabu Ierusalema ‘enaia manuna Kiniao ‘ebwaeadaitaiao si da me‘edi ‘emuia.

³⁰ Kigweruruiao ‘idi bosasa ‘u da ba‘ena, Bulomakau me‘olotodi ‘idi boda, tomota ‘idi iobai menonoiadi ma‘ediao, Sileba tomwanao si iaiaidi; Tomota si uiawana saia manuna ni‘atu ‘i lelewanedi.

³¹ ‘Inapwanao Aigupitoega si da apwesama; Aitiopia si da pili be nimadi si da iasitoto Eaubada ‘enaia.

³² Eaubada ‘ena wa da wari, ‘omi bare‘u ‘ina ‘ebeloinao; ‘Inapwana ‘ena wa da wari tuputupu; (Sela.)

³³ Tauna ‘i geru garewa ‘idi garewa, taudi lowaeneiega, tauna ‘enaia; Wa ‘ita, ‘enana ‘i ona, tauna ‘enana waiwaina.

³⁴ Pa‘arina wa da ‘inana Eaubada ‘enaia; ‘Ina bobo‘ai‘ailina Iseraela debanaia, Ta ‘ina waiwai garewa ‘edia.

³⁵ Eaubada ie, ‘imu esena tabuiao ‘ediega ‘oio ‘u didiga: Iseraela ‘ina Eaubada, pa‘arina ta waiwai ‘ina tomota i ‘ebwaedi. Eaubada ta da tupuna.