Salamo 66 - Buki Tabu Lowaenei 1919

SALAMO 66.

¹ Bare‘u maibo‘ana, bwau guausoara wa da bubuna Ieoba ‘enaia:

² ‘Ana esana ‘ina esaesa ‘u da wariei: ‘Ana tuputupu ‘u da giesaesai.

³ Eaubada ‘ena ‘u da ona, ‘Imu guinuao si didiga! ‘Imu waiwai ‘ana sinabwa ‘enega ‘amu tarauwarao ‘emuia si da tagwaredi.

⁴ Bare‘u maibo‘ana ‘i da bwagobwago ‘emuia, Ta ‘i da wari ‘emuia; ‘Amu esana ‘ena si da wari. (Sela.)

⁵ Wa da ma, be Eaubada ‘ina guinuao wa da ‘itedi; ‘Ina bubuna tai natudiao ‘edia ‘i didiga.

⁶ Ora ‘i gibunina bwa‘a iadaiadana ‘enaia: Boasi‘awana si rubwarena ‘aediega: ‘Ena ta eguausoara ‘enaia.

⁷ ‘Ina pa‘arinega ‘i loina ataia; Matana ‘ebeloinao si ‘ita‘i‘isidi: To loguitoasa gea‘abo si da gitu‘eiedi taudi. (Sela.)

⁸ ‘Omi tomotaiao, ‘ida Eaubada wa da tupuna, Ta ‘ana tuputupu ‘enana wa da enono‘ena:

⁹ Tauna iaruiaruada iawasina ‘i sa‘una, Ta ‘aeda nigea ‘i tagwaredi be si loniu.

¹⁰ Eaubada ie, ‘oio ‘u tooma ta ‘enega; Ni‘atu ‘u tooma, ‘atua sileba si toona.

¹¹ Gomana ‘ena ‘u me‘ema; Ni‘atu bwagila mwau ‘u sa‘una tolobwama ‘edia.

¹² Ni‘atu ‘u loina be tai debamaia si da pili; ‘Awe sabelulu be boasi ‘a rubwaredi; Ta esena ualoebwaina ‘ena ‘u me‘ema.

¹³ ‘Imu anua ‘ena ia da rugu ma‘igu ‘ebwaeadaita gabugabuiao, ‘Igu ona‘upa‘upaiao ‘emuia ia da bubudi,

¹⁴ Taudi sopagu si ‘inana ni‘atu, Ta ‘awagu ni‘atu ‘i oneone, ‘ena ia mia elo‘uia.

¹⁵ ‘Ebwaeadaita gabugabu iapaiapadi ‘emuia ia da ‘ebwaea, Sipi me‘olotodi ‘idi mu‘ana ma‘edi; Bulomakau ia da ‘ebwaea gota ma‘edi. (Sela.)

¹⁶ Wa da mai, ta wa da nono, iauiaumi Eaubada wa matautena, Ta iage ni‘atu ‘i guinuena iaruiaruagu manuna ia da ‘inana.

¹⁷ ‘Awaguiega ‘ena ia bwau, Ta meiaguiega ia tupuna.

¹⁸ ‘Abo bubuna bokobokona ia nuena ‘ateguia, ‘Inapwana gea‘abo ‘i da nonono;

¹⁹ Ta ona ‘ai‘aila Eaubada ni‘atu ‘i nono; ‘Igu sidasida ‘enana ni‘atu ‘ena ‘i sana‘ilama.

²⁰ Eaubada ta da tupuna, Tauna ‘igu sidasida, nai ‘ina nua‘ole‘ole, nigea i ‘ile‘ilena wa ‘eguiega.