Salamo 65 - Buki Tabu Lowaenei 1919

SALAMO 65.

¹ Eaubada ie, manuio tuputupu ‘i iamwaiamwa Siona ‘enaia: Ta ‘emuia ona‘upa‘upa si da bubuna.

² ‘Oio sidasida ‘u nonona, ‘Emuia esio maibo‘ana ‘i da mai.

³ Bubuna bokobokodi si ewaiwai ‘eguia: ‘Ima li‘oa‐loina manudi, ‘u da ‘utu iauledi.

⁴ Tai u ‘esinuena, ta u ‘au‘ewenama tauna ‘i bobo‘ana, Be ‘imu anuao ‘edia ‘i da miami: ‘Imu anua ‘ina bobo‘ana ‘i da sawesawemaia, ‘Imu anua ‘ina esena tabu.

⁵ Iage didiga ‘ediega ‘u da onalimana ‘emaia bubuna paruparuna ‘enega, ‘Ama ‘etoseana ‘ina Eaubada ie; ‘Oio bare‘u ‘ana ‘ebelosaroni iauiaudi ‘idi ‘ebe‘emisa, Ta taudi si mia ‘edasora oraia wate:

⁶ Tauna ‘ina pa‘arinega ‘oeaiao ‘i sa‘uiaidi; ‘I paimidi waiwaiega;

⁷ Tauna ora ‘idi bwautoila ‘i giemwa‘uleiena, ‘idi lisu ‘idi dududu, Ta tomotaiao ‘idi toitoila.

⁸ Taudi wate esena ‘edasoraia si miami si ‘atesa‘ara ‘imu we‘iwe‘iiaia ‘ediega: Gonagona ta asuinuanua ‘idi apwesaiao ‘u gieguausoaridi.

⁹ Bare‘u ‘ena ‘u mai, ta ‘u giepwasena, ‘Ina gwegwe esaesa ‘u sa‘una; Eaubada ‘ina ‘awa ‘i maa boasiega; Witi ‘u sa‘una manudi, ‘ena ni‘atu bare‘u ‘u sa‘u ‘ai‘ailina nadigega.

¹⁰ ‘Ina rabao ‘u giepwasena sinabwana; ‘Ina bau dudura‘ena‘ina ‘u bubu ‘ai‘ailidi: ‘Usana ‘enega ‘u gienuai; ‘Ina tabwa ‘u giebobo‘anena.

¹¹ ‘Imu bobo‘ana ‘ana iakwara ‘u sa‘u sakowasiena; Ta ‘imu ‘edao iapa si pesuna.

¹² Mitawa ‘ina neduiao ‘edia si pesupesu: Ta ‘oeao si paimidi eguausoarega.

¹³ Neduiao si maa iobai ‘ediega; Sa‘arao wate si ‘emiabodena witiega; Si bwau eguausoara manuna, wate si wari.