Salamo 64 - Buki Tabu Lowaenei 1919

SALAMO 64.

¹ Eaubada ie, ‘enagu ‘u da nono, ‘igu nuanua ‘ena: Iawasigu ‘u da egagare tarauwara matausina ‘enega.

² To‐guinua to‘umalidi ‘idi nuena kwaia ‘enega ‘u da kwaiegu; Bubuna bokobokona ‘ana to‐guinuao ‘idi toitoila ‘enega:

³ Taudi meiadi si geiadena sisi saia ‘atua, Ta ‘idi gita si ‘uledi, ona dareredi tugai:

⁴ Be ‘enega to bobo‘ai‘ailina si da ‘ula ‘enaia esena kwaia ‘edia: Si ‘ula manini ‘enaia, ta nigea si matamatauta.

⁵ Nuena to‘umalina ‘enega si giewaiwaiedi taudi; Si eonaona sikwa ‘adi sa‘ukwaia manuna; Si ona, Iaita ‘i da ‘itadi?

⁶ Bubuna bokobokodi si ‘ebesedi; Si gwae, ni‘atu a ‘ebesa ‘ai‘aila: Ta iauiauna ‘idi nuanua soradia, ta ‘atedi, ‘i ni‘u.

⁷ Ta Eaubada ‘edia ‘i da ‘ula; Gitega si da esilae manini.

⁸ Nadigega si da setupedi, taudi meiadi ‘i tooro ‘edia: Iauiaudi si ‘itedi si da lonepanepa.

⁹ Ta tai iauiauna si da matauta; Ta Eaubada ‘ina guinua si da simane, Ta ‘ina guinua manuna si da nuanua sinasinapu.

¹⁰ Taudi ‘idi bubuna paruparuna si da ‘uiawana Ieoba ‘enaia, ta ‘ena si da ‘emisa; Ta iauiaudi si paruparu ‘atedia si ta tuputupu.