Salamo 63 - Buki Tabu Lowaenei 1919

SALAMO 63.

¹ Eaubada ie, ‘oio ‘igu Eaubada; ia da ‘ebesa waiwaiieio: Iaruiaruagu tona‘ana ‘i iapasa manuio, esiogu ‘i iarakwaia manuio. ‘Asa iadaiadana ta neneta ‘enaia, ‘ena boasi nigea ‘i miami.

² Nadigega ni‘atu ia duneduneieio anua tabu ‘enaia, Sabi ‘ita ‘imu waiwai ta ‘imu esaesa.

³ Imu nua‘ole‘ole oboboma ‘i bobo‘ana wawasae iawasigu ‘enaia ta ‘enega; Sopagu si da tupuio.

⁴ Nadigega ia da tupuio tuta maiawasigu: ‘Amu esana ‘enega nimagu ia da gilagasi.

⁵ Iaruiaruagu tona‘ana ‘i da toa ‘atua iapa ta momonana ‘ediega; Ta ‘awagu ‘i da tupuio sopa guausoaridi ‘ediega;

⁶ ‘Ena ia nua‘i‘isio ‘igu ‘ebe‘eno ‘enaia, Ta manuio ia nuanua boiboi tomwanao ‘edia.

⁷ ‘Oio ni‘atu ‘agu lema ta ‘enega, Ta papemuao iauiaukwadi ‘ena ia da ‘eguausoara.

⁸ Iaruiaruagu ‘i muria serabemuia: Ataio ‘i gietoorogu.

⁹ Ta taudi iaruiaruagu si ‘ebe‘ebese, sabi loesaoorina, Si da tauia bare‘u ‘ina esena lo‘ubuna ‘edia.

¹⁰ Sisi‐saia ‘ina waiwai ‘enega si da ‘etasiwa iaule: Si da ‘epokise ‘adi ‘egu‘eguia.

¹¹ Ta king ‘i da eguausoara Eaubada ‘enaia: ‘Ebweuna ‘ebweuna tauna ‘enega ‘i ona‘upa‘upa ‘i da tuputupu; Taudi si onaona kabokabo ‘awadi ‘i da pota ta ‘enega.