Salamo 6 - Buki Tabu Lowaenei 1919

SALAMO 6.

¹ Ieoba ie, ‘imu guausoara ‘ena gea‘abo ‘u ba‘eba‘egu, Ta gea‘abo ‘u da sapigu ‘imu gamwasoara iaiiai ‘enega.

² Ieoba ie, ‘u da ‘atenua‘oleoleiegu; ‘abo‘agu ia ‘oaperu ta ‘enega; Ieoba ie, ‘u da giebobo‘anegu; lulugu si ‘elo‘uia ta ‘enega.

³ Iawasigu wate ‘i elo‘uia wawasae: Ta ‘oio, Ieoba ie, Maisa nai?

⁴ Ieoba ie, ‘u da ‘ilama, iawasigu ‘u da ‘etoseena: ‘U da ‘etoseegu ‘imu oboboma — nua ‘ole ‘ole manuna.

⁵ Mwawasa ‘ena nigea ‘e bweu ‘amu nua‘i‘isi ta ‘enega: Seola ‘ena iaita ‘emuia ‘i da lokagutoki?

⁶ ‘Igu sidesidega ia lo ‘ame‘ame; Boiboi iauna ‘igu ‘ebe‘eno ia edauna; ‘Igu ‘ebe‘eno ia epwasena mataserugu ‘ediega.

⁷ Matagu ‘i medarina ‘ate‘uia‘uia manuna; Ga ‘i ekadekaderi ‘agu tarauwara iauiauna manudi.

⁸ ‘Eguiega wa da tauia, ‘omi iauiaumi bubuna bokobokona wa guiguinue; ‘Igu dedo ‘enana Ieoba ni‘atu ‘i nonona ta ‘enega.

⁹ Ieoba ‘igu ‘awanoi ni‘atu ‘i nonona; Ieoba ‘igu sidasida ‘i nuanuana.

¹⁰ ‘Agu tarauwara iauiaudi si da omaiamaia ta ‘elo‘uia wawasae: Si da ‘ilama, si da omaiamaia manini.