Salamo 59 - Buki Tabu Lowaenei 1919

SALAMO 59.

¹ Eaubada ie, ‘agu tarauwarao ‘ediega ‘u da ‘etoseegu: Taudi si tooro mataguia ‘edia ‘u da sa‘u tu‘eiegu.

² Bubuna bokobokona ‘ana to guinuao ‘ediega ‘u da ‘etoseegu, Ta tai nuanuadi rara ‘ediega ‘u da ‘etoseeguma.

³ Wa ‘ita, si ‘eno kwaia iaruiaruagu manuna, ta ‘enega; To ewaiwai si egogonedi rererea mataguia: Ieoba ie, nigea ‘igu li‘oa loina manuna, nigea ‘igu loegesi manuna,

⁴ Si pili ta taudi si iage iage nigea ‘igu loegesi manuna: ‘U da tooro be ‘u lemegu, ta ‘u da ‘itama.

⁵ Tuga ‘oio, Ieoba ie bodao ‘idi Eaubada, Iseraela ‘ina Eaubada, ‘U da tooro be ‘ebeloinao iauiaudi ‘edia ‘u da apwesa: To li‘oa‐loina to‘umalidi gea‘abo ‘e bweuna ‘edia ‘ena ‘u da ‘ate‘atenua‘ole‘ole. (Sela.)

⁶ Asunuanuaia si ‘ila, ‘enadi kedewa ‘atua, Ta ‘asa si sakowasiena.

⁷ Wa ita, ‘awadiega si ‘ara‘aragima; Sisi‐saiao sopadi ‘edia: Si gwae, Iaita ‘i nono ta ‘enega?

⁸ Ta ‘oio, Ieoba ie, ‘u da edagiedi; ‘Ebeloinao iauiaudi ‘adi tuietuiea ‘u da sa‘u.

⁹ ‘Igu waiwai ie, ‘emuia ia da iamwaiamwana: Eaubada ‘igu anua ‘ebe‘ita‘i‘isi ‘etosorana ta ‘enega.

¹⁰ ‘Igu nua‘ole‘ole ‘ina Eaubada ‘i da nuganeguia: Eaubada ‘igu nuanua ‘agu tarauwarao ‘edia ‘i da e‘ita‘egu.

¹¹ Gea‘abo ‘u loeloemwawasidi, ‘abona nai ‘igu tomota si nuapupura: ‘U da lelewanedi ‘imu waiwaiega, ta ‘u da gimwa‘utedi, Ieoba ie ‘ima lawa.

¹² ‘Awadi ‘ina loegesi, ta sopadi ‘idi ona manudi, ‘Idi gagasa ‘enega si da giiaidi, Ta elia ta onakabokabo si oneone manudi.

¹³ Gamwasoarega ‘u da loegumwaridi, ‘u da loegumwaridi, be ‘enega gea‘abo wate si da miami: Ta ‘u da e‘itadi ‘aene Eaubada ‘i loina Iakobo ‘ena, Ga bare‘u ‘ina ‘ebelosaroniao. (Sela).

¹⁴ Ta asunuanuaia si da ‘ilama, si da bwaubwau kedewa ‘atua, Ta ‘asa si da pili sakowasiena.

¹⁵ Si da lopilidadana masura manuna, Ta si da mia masari ‘abo gamwadi nigea ‘i pawapawa.

¹⁶ Ta ‘abo‘agu ia da wari ‘imu pa‘arina manuna; Tamo, imu ‘atenua‘ole‘ole manuna ia da wari toila gonagonaia; ‘Oio ni‘atu ‘igu anua ‘etosorana ta ‘enega, Ta ‘ebedena ‘igu elo‘uia ‘ana asiata ‘enaia.

¹⁷ ‘Emuia, ‘igu pa‘arina ie, tuputupu ia da wariei: Eaubada ‘igu anua ‘etosorana ta ‘enega, ‘agu nua‘ole‘ole ‘ina Eaubada.