Salamo 58 - Buki Tabu Lowaenei 1919

SALAMO 58.

¹ Bubuna paruparuna wa oneone euwauwa nai? ‘Omi tai natunao, wa loina ‘ai‘aila nai?

² Tamo, ‘atemi ‘ena to‘umalina wa guinuena; Nimami ‘idi didiga wa ‘etopwapwana bare‘u ‘enaia.

³ To to‘umalidi gamwa ‘enega si mia gesi: Tuta ‘ai‘aila ‘enega si tubua si tauia gesi, onakabokabo si oneone.

⁴ ‘Idi darere nadigega moata ‘ina darere: ‘Atua moata tenatuituina tenana ‘i pota;

⁵ Tauna to oba ‘enadi nigea ‘i da nonona, Si obaoba sinasinapu wawasae.

⁶ Eaubada ie, saradi ‘u da ‘aubwage ‘awadi ‘enaia: Ieoba ie, laione menonoiadi saradi sinabwadi ‘u da egiiwa iaulei.

⁷ Si da doga iaulei ‘atua boasi ‘i pili didiga: ‘Ena ‘ina gita ‘i lotupuiedi, si da nadigega ‘upwa‘upwa‘ai‘ailidi.

⁸ Si da nadigega pwapwalewa ‘i doga ta ‘i sawara: ‘Atua waine ‘ina tubua geiogeioi, tauna sinara nigea i ‘ita‘ita.

⁹ ‘Ena ‘ami ‘urena nigea kwakwakwara si tootoodi, ‘Atua bwawabwawa ‘i da ‘ewedi, mama‘ina ta ‘ara‘arasina rererea.

¹⁰ To bubu paruparuna ‘i da guausoara ‘ena e‘isa i ‘itena: ‘Aena ‘i da ‘utudi to to‘umalidi raradi ‘enaia.

¹¹ Ta ‘enega tai si da gwae, Ona ‘ai‘aila to bubu paruparuna ‘ana e‘isa ‘i miami: Ona ‘ai‘aila Eaubada ‘i miami tauna ‘i loina bare‘uia.