Salamo 57 - Buki Tabu Lowaenei 1919

SALAMO 57.

¹ Eaubada ie, ‘u da ‘atenua‘ole‘oleiegu, ‘u da ‘atenua‘ole‘oleiegu; Iaruiaruagu ‘i denadena ‘emuia ta ‘enega: Tamo, papemuao iauiaukwadi ‘ena ia da dena, Ga iage to‘umalidi gete si da gumwara.

² Ia da bwau Eaubada To ‘Etana Sana ‘enaia; Eaubada ‘ena tauna iage iauiauna ‘i bubudi manugu.

³ Garewega ‘i da etunenama, ta ‘i da ‘etoseegu, Tuta enega tauna ‘aene ‘i da tonegu ‘i eliegu; (Sela.) Eaubada ‘ina nua‘ole‘ole ta ‘ina ona ‘ai‘aila ‘i da etunediwa.

⁴ Iaruiaruagu laione ‘edia ‘i miami; Ia ‘eno‘eno taudi si ‘ara‘arata ‘edia, Tuga tai natudiao, taudi saradi gita tomotai ta tupu ‘ana gitao, Ta meiadi sisi‐saia mamatana.

⁵ Eaubada ie, ‘u da miatu‘e garewa ‘etanaia; ‘Imu esaesa ‘i da ‘ebare‘u maibo‘ana ‘etanaia.

⁶ Gomana si sa‘una ‘igu sa‘ulaga manudi: Iaruiaruagu ‘i kopukopu: Gaula si salena mataguia; Taudi tuga ‘ena si be‘u soranaia. (Sela.)

⁷ ‘Ategu ‘i mia‘i‘ita, Eaubada ie, ‘ategu ‘i mia‘i‘ita: Ia da wari, tamo, ia da wari tuputupu.

⁸ ‘Igu esaesa, ‘u da tooro; ‘u da tooro, ‘ebebinobino‘o ta api: Ia da tooro manini taugumo.

⁹ Eaubada ie, ‘emuia ia da lotuputupu, tomota gamwagamwanidia: ‘Emuia ia da warituputupu ‘ebeloina gamwagamwanidia.

¹⁰ ‘Imu nua‘ole‘ole sinabwana ga garewaia ta ‘enega, Ta ‘imu ona‘ai‘aila garegarewa ‘enaia.

¹¹ Eaubada ie, ‘u da miatu‘e garewa ‘etanaia; ‘Imu esaesa ‘i da ‘ebare‘u maibo‘ana ‘etanaia.