Salamo 55 - Buki Tabu Lowaenei 1919

SALAMO 55.

¹ Eaubada ie, ‘igu sidasida ‘u da enonotenasiie; Ta ‘igu ‘awanoiega gea‘abo ‘u kwaikwaieio.

² ‘U da lomata‘i‘isigu, ta ‘eguia ‘u da onalimana: ‘Igu elo‘uia ‘ena nigea ia miamiabaula, ta ia esidasida;

³ Tarauwara ‘enana manuna, To to‘umalidi ‘idi mwaumwau manuna; Bubuna bokobokona si ‘ulena ‘eguia ta ‘enega, Ta gamwasoara ‘enega si e‘atemutuiegu.

⁴ ‘Ategu ‘i elo‘uia sinabwana soraguia: Ta mwawasa ‘ina didigaiao ‘eguia si be‘u.

⁵ ‘Atesa‘ara ta dedera ‘eguia si mai, Ta giligiliubwa ‘i apwarigu.

⁶ Ta ia gwae, Eguma mapapegu bunetutu ‘atua! Ga ia da taeawa, ta ia da mia eiawai‘ata.

⁷ U ‘ita, ga ia da lopilidadana ‘edasora, Mitawaia ia da mia baula. (Sela.)

⁸ Ia da lomanini ‘ebe‘eiauiaukwa ‘enaia Iagila sinabwana ta wedilia ‘ediega.

⁹ ‘Inapwana ie, meiadi ‘u da loesaoori ta ‘u da giweari: Etoitoila ta e‘upwa ni‘atu ia ‘itedi ‘asaia ta ‘enega.

¹⁰ Asiataia be boiboiia si tautauia dadane ‘ina ‘ari debanaia: Bubuna bokobokona wate ta wasegigi si miamia gamwanaia.

¹¹ Bubuna to‘umalina gamwagamwanaia ‘i miami: Didiga mwaumwau ta kabo nigea ‘ina ‘edao ‘i da pilisinedi.

¹² Nigea tarauwara ‘i ba‘egu ta ‘enega; Ga kapekapeana ia da ‘a‘arina: Ta nigea tauna ‘i guitoasegu ‘i giesinabwena tauna ‘eguia; Ga ia da kwaiegu tauna ‘enega:

¹³ Ta oio, tai ‘agu epata, ‘Agu ‘arauna, ta gosi‘ai‘ailigu.

¹⁴ Nuena dibidibi taterua ta nuanua rererea, Eaubada ‘ina anua ‘ena ta lopilidadana pwaru ma‘edi.

¹⁵ Mwawasa ‘i da mai manini ‘edia, Maiawasidi si da mwa‘uta gaula ‘enaia: Bubuna to‘umalina ‘idi anua ‘ena ‘i miami ta ‘enega, gamwagamwanidia.

¹⁶ Ta manugu, Eaubada ‘ena ia da bwau; Ta Ieoba ‘i da ‘etoseegu.

¹⁷ Asunuanuaia ta, gonagonaia be, asuoreoreia be, ia da onaona, ta ia da esidasida: Ta ‘enagu ‘i da nonona.

¹⁸ Iaruiaruagu ni‘atu ‘i lagwalimena guguia ‘ena tauna losaia mataguia ‘enega: Iauiaudi si e‘upwa ma‘eguao ta ‘enega.

¹⁹ Eaubada ‘i da nonodi, ta ‘edia ‘i da ona limana, Tuga tauna lowaeneiega ‘i miami, (Sela.) Taudi nigea ‘e bweu ‘idi ‘ebe‐ebuibuimo, Ta taudi nigea Eaubada si ‘amaiabena.

²⁰ Taudi ma‘enao si mia guguia ‘edia nimana ‘i iasitotona: ‘Ina ona‘upa‘upa ni‘atu ‘i gibesobeso:

²¹ ‘Awana ‘i newanewa bata ‘atua, Ta ‘atena ‘i losaia: ‘Ina ona si nua wawasae bunama ‘enaia, Ta si ‘esisi‐saiao lisi‐lolodi.

²² ‘Amu ‘a‘ara Ieoba ‘ena ‘u da sa‘u, ta ‘i da gi‘eteio: Gea‘abo sa‘i ‘i da tagwatagwara be to paruparudi si da loniu.

²³ Ta ‘oio, Eaubada ie, ‘u da ‘ewamwa‘utedi saoora ‘ina gaula ‘enaia: Tai raraiao ta tai kabo gea‘abo ‘idi asiata ‘adi ‘upwa‘eruena ‘edia si da apweapwesa; Ta ‘abo‘agu ‘emuia ia da ‘emisa.