Salamo 54 - Buki Tabu Lowaenei 1919

SALAMO 54.

¹ Eaubada ie, ‘u da ‘etoseegu, ‘amu esanega, Ta ‘u da loinegu ‘imu waiwai ‘enaia.

² Eaubada ie, ‘igu sidasida ‘u da nono; ‘Awagu ‘ina ona ‘u da nonodi.

³ To‘u‘umara si tooro mataguia ta ‘enega, Ta tai didiga iaruiaruagu si ‘ebe‘ebese: Eaubada nigea si sa‘usa‘u matadia. (Sela.)

⁴ U ‘ita, Eaubada ‘igu to leme: ‘Inapwana taudi iaruiaruagu si lemena ‘i miami ma‘edi.

⁵ To‘umalina nina ‘i da e‘isa ‘agu tarauwarao ‘edia: ‘Imu ona‘ai‘ailega ‘u da loesaooridi.

⁶ ‘Ebwaeadaita ma‘anuagu ia da taria ‘emuia: Ieoba ie, ia da lotuputupu ‘amu esana ‘enaia, ‘i bobo‘ana ta ‘enega.

⁷ ‘Ebeloniu maibo‘ana ‘enega ni‘atu i ‘etoseegu ta ‘enega; Ta matagu ni‘atu ‘igu nuanua i ‘itena ‘agu tarauwarao ‘edia.