Salamo 53 - Buki Tabu Lowaenei 1919

SALAMO 53.

¹ To euwauwa ni‘atu ‘i gwae ‘atenaia, Eaubada nigea ‘e bweu. Si to‘umali, ta bubuna bokobokona geiogeioi ni‘atu si guinua; Iage bobo‘ana ‘ana to‐guinua nigea ‘e bweu ‘i miami.

² Eaubada garewega i ‘ita mwa‘uta tomota natunao ‘edia, Be i ‘ita nai aina si miami si mwaratonina, Eaubada manuna si ‘ebe‘ebesa.

³ Iauiaudi ni‘atu si ‘ila; si ebi‘i rererea; Iage bobo‘ana ‘ana to guinua nigea ‘e bweu ‘i miami, nigea ‘e bweu.

⁴ Bubuna bokobokona ‘ana to guinuao nigea nai ma‘idi sinasinapumo? Taudi ‘igu tomota si ‘e‘ani ‘atua si ‘e‘ai palaua, Ta nigea si bwau Eaubada ‘enaia.

⁵ Si matauta sinabwana, ‘ena ‘ebematauta nigea ‘i miami: Tauna ‘i miabaula matamuia Eaubada luluna ‘i lelewanedi ta ‘enega; Ni‘atu ‘adi omaiamaia ‘u sa‘una, Eaubada ‘i e‘idi‘idiedi ta ‘enega.

⁶ Iseraela ‘ana ‘etoseana Sionega ‘i apwesama eguma! ‘Ena Eaubada ‘ina tomota ‘idi miaionaiona i ‘ilenama, Ga Iakobo ‘i da guausoara, ta Iseraela ‘i da uiawana.