Salamo 52 - Buki Tabu Lowaenei 1919

SALAMO 52.

¹ Tai waiwai ie! To‘ase manuna tauio ‘u tupumu wasegigi ‘enaia? Eaubada ‘ina nua‘ole‘ole ‘i mia ataia.

² Meiaio bubuna to‘umalina ‘i wasewasegigie; ‘Ebesui mamatana ‘atua, ‘i guinua kabokabo.

³ Bubuna to‘umalina ‘u nuanuana wawasae bubuna bobo‘ana ‘enaia; Ta ona kabokabo ‘u nuanuana wawasae ona paruparuna ‘enaia. (Sela.)

⁴ Ona si ‘e‘ai iauiauna ‘u nuanuana, Oio meia kabokabo.

⁵ Eaubada wate ‘i da ‘enapara ataeio, ‘I da ‘au‘ewa tu‘eieio, ta ‘imu anuega ‘i da lisiio. Ta maiawasidi ‘idi ‘asa ‘enega ‘i da dabuio. (Sela.)

⁶ To paruparuna wate si da ‘ita, ta si da ‘atesa‘ara, Ta si da edagi manuna, si da gwae,

⁷ Wa ‘ita, gete tai nina nigea Eaubada i ‘ewa‘ewa be ‘ina ‘ebepa‘ara; Ta ‘ina oesi ‘ana iau ‘ena i ‘emisa, Ta ‘ina to‘umalina ‘enega ‘i giewaiwaiena.

⁸ Ta ‘abo‘agu manuna, ‘abo‘agu nadigega kaiwe olibe karakarawina Eaubada ‘ina anua ‘ena: Eaubada ‘ina nua‘ole‘ole ‘ena ia ‘emisa ataia ta ataia.

⁹ ‘Emuia ia da tuputupu ataia, ‘oio ‘u guinuena ta enega: Ta ‘amu esana ‘ena ia da iamwaiamwana, ‘i bobo‘ana ta ‘enega, ‘imu to tapwaroro ‘esasedi matadia.