Salamo 51 - Buki Tabu Lowaenei 1919

SALAMO 51.

¹ Eaubada ie, ‘u da ‘atenua‘ole‘oleiegu, ‘imu oboboma‐nua‘oleole na‘ieana; Na‘ieana ‘imu nua‘ole‘ole nuana ‘ana iauiaudidigana ‘igu li‘oaloina ‘u da kweudi.

² ‘Igu bubuna bokobokona ‘enega ‘u da ‘utu ‘ai‘ailigu, Ta ‘igu loegesi ‘enega ‘u da gie‘esaseguia.

³ Igu li‘oa‐loinaiao ia simanedi ta ‘enega; Ta ‘igu loegesi mataguia ‘i mia ataia.

⁴ ‘Emuia, ‘emuia tebweuio, ni‘atu ia loegesi, Ta iage nina to‘umalina matamuia ni‘atu ia guinuena: Be ‘enega ‘u da paraparu ‘ena ‘u gwaegwae, Ta ‘u da ‘esasena ‘ena ‘u loina.

⁵ U ‘ita, bubuna bokobokona ‘enega ia tubua; Ta loegesi ‘ena sinagu i ‘euwanegu.

⁶ U ‘ita, ona‘ai‘aila ‘u nuanuana esena gamwanaia ‘edia: Ta esena kwaia ‘ena ‘u da bubugu be sinasinapu ia da mwaratoni.

⁷ Isopega ‘u da ‘utugu, be ia da ‘esasegu: ‘U da ‘utugu, be ia da wakewakekegu wawasae sinou ‘enaia.

⁸ ‘U da bubugu be guausoara ta uiawana ia da nonona; Be ‘enega lulugu ‘u pisapisaridi si da ‘eguausoara.

⁹ Maniniio ‘u da kwaiena ‘igu loegesi ‘ediega, Ta ‘igu bubuna bokobokona iauiauna ‘u da giekweudi.

¹⁰ Eaubada ie, ‘ate‘esasena ‘u da mwerurui ‘eguia; Ta iaruiarua ‘ai‘aila ‘u da mwerurua lima soraguia.

¹¹ Matamuiega gea‘abo ‘u da ‘ule‘ulegu; Ta ‘imu iaruiarua tabuna gea‘abo ‘eguiega ‘u da ‘ewa‘ewa.

¹² ‘Imu ‘etoseana ‘ina guausoara ‘eguia ‘u da ‘ebwaea limane: Ta iaruiarua tagwatagwarina ‘enega ‘u da gietoorogu.

¹³ Ga to li‘oa‐loina ‘imu ‘edao ia da e‘ita ‘edia; Ta to loegesi si da nuaebuni ‘emuia.

¹⁴ Rara ‘ana to‘umalina ‘enega ‘u da ‘etoseegu, Eaubada ie, ‘oio ‘agu ‘etoseana ‘ina Eaubada; Ta meiagu ‘imu bubuna paruparuna manuna ‘i da wari toila.

¹⁵ ‘Inapwana ie, sopagu ‘u da gigegedi; Ta ‘awagu ‘amu tuputupu ‘i da e‘itae.

¹⁶ Taria nigea ‘imu ‘ebeguausoara ta ‘enega; nai ia da ‘ebwaena; ‘Ebwaeadaita gabugabu nigea ‘imu ‘ebe‘uiawana.

¹⁷ Eaubada ‘ana tariao iaruiarua pisarina: Eaubada ie, ‘ate episarina ta e‘ida‘idana nigea ‘u da sinarina.

¹⁸ ‘Imu ‘ebeguausoara bobo‘ana ‘enega ‘u da bubuna bobo‘ana Siona ‘enaia; Ierusalema ‘ana ‘ari‐gurewa ‘u da ‘abidi.

¹⁹ Ga bubuna paruparuna ‘ana tariao ‘imu ‘ebeguausoara, ‘ebwaeadaita gabugabu ta ‘ebwaeadaita gabugabu ma‐iboana; Ga bulomakau si da ‘ebwaeae ‘imu ‘ebetaria ‘enaia: