Salamo 50 - Buki Tabu Lowaenei 1919

SALAMO 50.

¹ Eaubada, tuga Eaubada, Ieoba, ni‘atu ‘i ona, Ta bare‘u ‘i bwauiena sinara ‘ina tu‘ema ‘enega ga ‘ina mwa‘uta ‘enaia.

² Siona ‘enega, ‘ana ‘ita bobo‘ana maibo‘anega, Eaubada ni‘atu ‘i saema.

³ ‘Ida Eaubada ‘i da mai, ta gea‘abo ‘i da enono: Awe sabelulu ‘i da ‘e‘a matanaia, Ta ‘atua wedilia ‘i da sakowasiena.

⁴ ‘I da bwau garewa lo‘etana ‘enaia, Ta bare‘uia, be ‘ina tomota ‘i da loinedi:

⁵ ‘Igu to ‘esasena ‘ai‘ailao wa da egogona ‘eguia; Taudi ona‘upa‘upa ni‘atu si bubuna ma‘ieagu tariega.

⁶ Ta garewa ‘ina bubuna paruparuna si da simane; Eaubada ‘i to loina tauna ta ‘enega. (Sela.)

⁷ Wa da nono, ‘igu tomota ie, ta ia da gwae; Iseraela ie, ta ia da simana ‘emuia: ‘Abo‘agu Eaubada, ‘imu Eaubada.

⁸ Gea‘abo ia da ba‘eba‘eio ‘imu tariao manudi; Ta ‘imu ‘ebwaeadaita gabugabu mataguia si mia ataia.

⁹ Gea‘abo ‘e bweu bulomakau ia da ‘ewa‘ewa ‘imu anuega, Nai gota me‘olotodi ‘imu ‘ari ‘ediega.

¹⁰ Mitawa ‘ina iobai iauna ‘igu iobai ta ‘enega, Ta bulomakau ‘oea tausana ‘edia.

¹¹ ‘Oea ‘idi manua iauiaudi ia mwaratonidi: Ta mitawa ‘ina bosasa ‘eguia si miami.

¹² ‘Abo ia bobotana, gea‘abo ia simasimana ‘emuia: Gabura ‘igu iage ta ‘enega, ta ‘ina maa.

¹³ ‘Aene bulomakau esiodi ia da ‘e‘ai, Nai gota rarana ia da numa?

¹⁴ Lotuputupu ‘ana taria wa da ‘ebwaea Eaubada ‘enaia; Ta ‘imu ona‘upa‘upa ‘u da sa‘u To‐lo‐‘etana sana ‘enaia;

¹⁵ Asiata ‘ate‘uia‘uia ‘eguia ‘u da bwau; Ia da ‘etoseemu, ta ‘u da ‘awaeseesegu.

¹⁶ Ta to‐to‘umalidi ‘edia Eaubada ‘i gwae, To‘ase ‘u da bubu be ‘igu loina tomwanao ‘u da simana, Ta ‘aene ‘igu ona‘upa‘upa ‘awaio ‘enega u ‘inana?

¹⁷ E‘ita ‘u guitoasena ta ‘enega, Ta ‘igu ona u ‘ula‘iledi guaumuia.

¹⁸ ‘Ena to anawara u ‘itena, ‘u tagwaremu ga ma‘ieana, Ta ni‘atu u ‘ewa‘ewa to loelata ma‘ediao.

¹⁹ ‘Awaio ‘u tagwarena to‘umalina ‘ena, Ta meiaio kabokabo ‘i bubuna.

²⁰ ‘U miatoa ta tasio u ‘awato‘umaliena; Ta sinaio tauio natuna manuna ‘u ona geiogeioi.

²¹ ‘Iage getedi ni‘atu ‘u guinua, ga ia ‘araenono; ‘U nuena ‘aene ‘abo‘agu rererea nadigega tauio: Ta ia da ba‘emu, ta ia da sa‘u‘ai‘ailidi matamuia.

²² Gete ‘enega gete ‘u da nuena, ‘omi Eaubada wa nuapupurena, ‘Abona nai ia sabu lelewanemi, ta gea‘abo ‘e bweu ‘i da ‘eto‘etoseemi:

²³ Tauna tuputupu ‘ina taria i ‘ebwaea tauna i ‘awaeseesegu: Ta tauna ‘ina bubuna ‘i sa‘u ‘ai‘ailina Eaubada ‘ina ‘etoseana ia da e‘ita ‘enaia.