Salamo 5 - Buki Tabu Lowaenei 1919

SALAMO 5.

¹ Ieoba ie, ‘igu ona ‘u da nonodi, ‘Igu nuanua ‘u da nuena.

² ‘Igu dedoi ‘enana ‘u da nonona, ‘igu King, ta ‘igu Eaubada: ‘Emuia ia sidasida ta ‘enega.

³ Ieoba ie, gonagonaia ‘enagu ‘u da nonona; Gonagonaia ‘igu sidasida ia da sa‘u ‘ai‘aili ‘emuia, ta ia da lomata ‘i‘isio.

⁴ ‘Oio nigea Eaubada guausoara to‘umalina ‘enaia: To‘umalina gea‘abo ‘emuia ‘i da miami.

⁵ Gagasidi gea‘abo si da tooro matamuia: Bubuna bokobokona ‘ana toguinua iauiaudi ‘u guitoasedi.

⁶ Taudi si onakabokabo ‘u da giesaooridi: Tai rara ‘i giedau ta ‘i ekabokabo Ieoba geanuana.

⁷ Ta ‘abo‘agu, ‘imu obobomanua‘ole‘ole ‘ana iau ‘ena ia da mai ‘imu anuaia: Matausio ‘ena ia da bwagobwago ‘imu anua tabu matanaia.

⁸ Ieoba ie, ‘u da nuganegu, ‘imu bubuna paruparuna ‘enaia ‘agu tarauwara manudi; ‘Imu ‘eda ‘u da gienonokwaikwaina mataguia.

⁹ Nigea ‘e bweu iage ‘ai‘aila ‘awadi ‘ena ta ‘enega; ‘Atedi to ‘umalina ‘arena: Magadi ‘ari‘ari ‘egegena; Meiadi si gienonokwaikwaina.

¹⁰ Eaubada ie, ‘u da ‘awato‘umaliedi; Taudi ‘idi nuanega si da be‘u: ‘Idi li‘oa‐loina ‘adi iau ‘ena ‘u da pa‘idi; ‘Emuia si losaia ta ‘enega.

¹¹ Ta iauiaudi ‘emuia si ‘emisa si da guausoara, Guausoara manuna si da bwau ataia, ‘u lemedi ta ‘enega: Taudi wate ‘amu esana si obobomena si da guausoara ‘emuia.

¹² To paruparudi ‘u da onaobobomedi ta ‘enega: Ieoba ie, ‘u da miasakowasiena nua‐bobo‘anega ‘atua lawa ‘enega.