Salamo 49 - Buki Tabu Lowaenei 1919

SALAMO 49.

¹ Gete wa da nono, ‘omi tomota iauiaumi: Wa da nono, ‘omi to mia bare‘uia iauiaumi:

² Lo‘ubuna ta lo‘etana ruarua, Esaesa ta gomabeso rererea.

³ ‘Awagu sinasinapu ‘i da oneone; Ta ‘ategu ‘ina nuanua ‘i da sinapuiega.

⁴ Tenagu ia da tagware onasemalimali ‘enaia: ‘Igu onamasegilagila ia da gieapwesa api ‘ena,

⁵ To‘ase manuna ia da matauta to‘umalina ‘ana asiatao ‘edia, ‘Ena bubuna bokobokona ‘ae‘edu‘eduguia si sakowasiegu?

⁶ Taudi ‘idi gwegwe ‘ena si ‘emisa, Ta si gagasa ‘idi oesi ‘ana iau manuna;

⁷ Nigea ‘e bweu tasina ‘i da sa‘ugagina ‘e bweu bubuna manuna, Nai Eaubada ‘ana e‘isa ‘i da ‘ebwaea:

⁸ (Iaruiaruadi ‘adi sa‘ugagi sinabwana ta ‘enega, Ta ‘i da ‘e mia ataia:)

⁹ Be ‘enega ‘i da mia ataia, Be ‘enega gea‘abo daula ‘i da ‘ita‘ita.

¹⁰ I ‘itena ‘aene to sinasinapu si mwawasa ta ‘enega, To euwauwa be to‘eiobai si saoora rererea, Ta ‘idi oesi si pilisinena mari tomota ‘edia.

¹¹ ‘Idi nuanua ‘atedia, ‘aene ‘idi anua si da mia ataia, Ta ‘idi ‘ebemia epata‐tomota iauiauna ‘edia; ‘Idi ‘asa si eesedi taudi ‘adi esanega.

¹² Ta tai nigea ‘i mia ataia ‘amaiaba ena: Tauna ‘atua iobai si saoora.

¹³ Gete ‘idi ‘eda ‘idi euwauwa: Ta muridia tai si nuanuana ‘idi ona. (Sela.)

¹⁴ Si aseiedi be si iau Seola manuna; Mwawasa ‘idi to‐‘ita‘i‘ita‐sipi: Ta to tooro paruparu si da loinedi gonagonaia; Ta ‘adi ‘ita bobo‘ana ‘i da Seola manuna be ‘i da ‘arasina, be ‘enega gea‘abo ‘e bweu ‘ebemia ‘enaia.

¹⁵ Ta Eaubada iaruiaruagu ‘i da e‘isa Seola nimanega: Tauna ‘i da ‘au‘ewegu ta ‘enega. (Sela.)

¹⁶ Gea‘abo ‘u da matauta ‘ena ‘e bweu ‘i esaesa, ‘Ena ‘ina anua ‘ana esaesa ‘i sinabwa:

¹⁷ ‘Ena ‘i mwawasa gea‘abo ‘e bweu iage ‘i da ‘ewa‘ewa ta ‘enega; ‘Ina esaesa gea‘abo ‘i da mwa‘uta murinaia.

¹⁸ ‘Ena maiawasina iaruiaruana i ‘awabobo‘anena, Ta tai si tuputupuio, ‘ena ‘u bubuna ‘ai‘aila tauio ‘emuia,

¹⁹ Tubunao ‘idi epata tomota ‘ena ‘i da tauia; Gea‘abo ma‘edana si da ‘ita‘ita ‘e bweu tuta.

²⁰ Tai ma‘ana ‘amaiaba, ta nigea ‘i sinasinapu, Tauna ‘atua iobai si mwawamwawasa.