Salamo 48 - Buki Tabu Lowaenei 1919

SALAMO 48.

¹ Ieoba sinabwana, ta si da tupuna sinabwana, ‘Ida Eaubada ‘ina ‘asa esaesa ‘enaia, ‘ina ‘oea tabu ‘enaia.

² ‘Ina miatu‘e ‘ana ‘ita bobo‘ana, bare‘u maiboana ‘ina ‘ebeguausoara, Tauna ‘oea Siona, iaarata deinao ‘edia, King sinabwana ‘ina ‘asa esaesa.

³ Eaubada ‘i giapwesena ‘ina anua esaesa ‘edia ‘ebedena manuna.

⁴ Wa ‘ita ta ‘enega, king si egogona taudi, Si tauia rererea, deinaia.

⁵ Si ‘itena, ga nuadi ‘i owana; Si ‘atesa‘ara, si sawara manini.

⁶ Dedera ‘i giiaidi nada; ‘Elo‘uia, atua waine ‘i edaedadama.

⁷ Bomatuiega Waga Tasisa ‘u wearidi.

⁸ Na‘ieana ‘a nonona, na‘ieana a ‘itena Bodao ‘idi Ieoba ‘ina ‘asa esaesa ‘enaia, ‘ida Eaubada ‘ina ‘asa ‘enaia: Eaubada ‘i da giepa‘ara ataia. (Sela.)

⁹ Eaubada ie, ‘imu oboboma nua‘ole‘ole ni‘atu manuna ‘a nuanua, ‘Imu anua tabu gamwagamwanaia.

¹⁰ Na‘ieana ‘amu esana, Eaubada ie, Na‘ieana ‘amu tuputupu bare‘u ana ‘ebelosaroniao ‘edia: ‘Ataio ‘i maa bubuna paruparunega.

¹¹ ‘Oea Siona ‘i da guausoara, Iuda natunao mewainedi si da uiawana, ‘Imu loinao manudi.

¹² Siona ‘ena wa da lopilidada na, ta wa da sakowasiena: ‘Ina anua ‘etosoradi wa da simane.

¹³ ‘Ina ‘ebepa‘araiao wa da ‘ita‘ai‘ailidi, ‘Ina anuaesaesaiao wa da nua‘i‘isidi; Be ‘enega wa da simanena ‘epatatomota muriega ‘enaia.

¹⁴ Eaubada gete ‘ida Eaubada ataia ta ataia ‘enega: Tauna ‘i da e‘ada to ‘au‘ewena ga mwawasa ‘enaia.