Salamo 47 - Buki Tabu Lowaenei 1919

SALAMO 47.

¹ ‘Omi tomota iauiaumi, nimamiega wa da ‘aupwasipwasi; Eaubada ‘ena wa da bwau ‘enami waiwaiega.

² Ieoba To ‘Etana Sana ‘i didiga ta ‘enega; Tauna ‘i King sinabwana bare‘u maibo‘ana ‘enaia.

³ Tomota ‘i da gimwa‘utedi ‘agaraudaia, Ta ‘ebeloinao ‘aeda ‘ubunidia.

⁴ ‘Ida edaguma tauna i ‘ita‘esi‘esinua manuda, Iakobo tauna ‘i obobomena ‘ina to bobo‘ai‘ailina. (Sela.)

⁵ Eaubada ‘i tu‘e bwauiega, Ieoba ioguli ‘enanega.

⁶ Wa da wari tuputupu Eaubada ‘enaia, wa da wari tuputupu: Wa da wari tuputupu ‘ida King ‘enaia, wa da wari tuputupu.

⁷ Eaubada bare‘u maibo‘ana ‘ina King ta ‘enega: Wa da wari tuputupu sinasinapuiega.

⁸ Eaubada ‘i loina ‘ebeloinao ‘edia: Eaubada ‘i miatoa ‘ina ‘ebemi esaesa tabu ‘enaia.

⁹ Tomota ‘idi ‘inapwanao si egogona Aberaamo ‘ina Eaubada ‘ina tomota: Bare‘u ‘ana lawaiao Eaubada ‘ina iage ta ‘enega; Tauna ‘i mia To ‘Etana sana.