Salamo 46 - Buki Tabu Lowaenei 1919

SALAMO 46.

¹ Eaubada ‘ida ‘ebedena ta ‘ida pa‘arina, Tauna lema ta loba ‘ai‘aila elo‘uia ‘enaia.

² Ta ‘enega gea‘abo ta da matamatauta, ‘abo bare‘u ‘ina bubuna ‘i ebuni, Ta ‘abo ‘oea si loniu ora soradia;

³ ‘Abo ‘adi boasi si bwaubwau didiga ta si loniu, ‘Abo ‘oae si dededera ‘adi sinabwa ‘enega (Sela.)

⁴ ‘E bweu boasi ‘i miami, narinao Eaubada ‘ina ‘asa si gieguausoarina, To ‘Etana Sana ‘ina anua‐tabenakeleao ‘idi esena tabu.

⁵ Eaubada gamwagamwanaia; gea‘abo ‘i da loniu: Eaubada ‘i da lemena, tomwa ‘uli‘ulitaia.

⁶ ‘Ebeloinao si egamwagamwagu, ‘asa si loniu: ‘Enana ‘i gieapwesena, bare‘u ‘i doga.

⁷ Bodao ‘idi Ieoba ‘i miami ma‘eda; Iakobo ‘ina Eaubada ‘ida ‘ebedena. (Sela.)

⁸ Wa da mai, Ieoba ‘ina guinua wa da ‘itadi, Tauna saoora ‘i bubudi bare‘uia.

⁹ Saiaiao i ‘upwedi ga bare‘u ‘ana ‘ebelosaroni; Tupu ‘i lasena, ta gita i ‘upwa ruena; Waga lisilisi ‘i gabudi aweiega.

¹⁰ Wa da mia oonua, ta wa da mwaratoni ‘abo‘agu Eaubada; Si da gitu‘eiegu ‘ebeloina gamwagamwanidia, Si da gitu‘eiegu bare‘u ‘enaia.

¹¹ Bodao ‘idi Ieoba ‘i miami ma‘eda; Iakoba ‘ina Eaubada ‘ida ‘ebedena. (Sela.)