Salamo 45 - Buki Tabu Lowaenei 1919

SALAMO 45.

¹ ‘Ategu ‘i maa‘apu‘apu iage bobo‘ana ‘enega: Ia ona king ‘ina iage ni‘atu ia bubuna manuna: Meiagu to ‘etoladi manini ‘ina peni:

² ‘Oio ‘amu ‘ita bobo‘ana wawasae tomota natunao ‘edia: Oboboma si siwena sopaio ‘edia: Ta ‘enega Eaubada ‘i giebobo‘ana ataemu.

³ ‘Imu sisi saia ‘u da losipwa bwadagaio ‘ena, ‘Oio to ewaiwai saio, ‘Imu esaesa ta ‘imu to‐‘etana‐sana.

⁴ Ta ‘imu to‐‘etana‐sana ena ‘u da tauia ‘ai‘aila, Ona ‘ai‘aila be, bubuna nuana be, bubuna paruparuna be, manudi: Ta ‘ataio iage didiga ‘i da e‘itaio.

⁵ ‘Amu tupu ‘ana gita mamatadi; Tomotaiao si be‘u ‘agaraumuia; King ‘ana tarauwarao ‘atedi ‘ena si miami.

⁶ ‘Imu ‘ebemi‐esaesa, Eaubada ie, ‘i mia ataia ta ataia: Loina ‘ai‘aila ‘ana keweliwelili esaesa tauna ‘imu ‘ebeloina ‘ana keweliwelili esaesa.

⁷ Bubuna paruparuna ni‘atu ‘u nuanuana sinabwana, ta bubuna to‘umalina ni‘atu ‘u guitoasena: Ta ‘enega Eaubada, ‘imu Eaubada, ‘i eoromu Sinabwa wawasae ‘amu epata ‘edia guausoara ‘ana bunamega.

⁸ ‘Amu ‘oama iauiaudi ‘adi mainao muro be, aloe be, kasia be: Anua bosima ‘ediega api si gieguausoarimu.

⁹ King natudiao mewainedi ‘imi iineao arawata ‘edia si miami: Ataio ‘ena kuini ‘i tooro ‘ana ‘oama gola Opira.

¹⁰ Natugu me wainena ie, ‘u da nono, be ‘u da nuanua, ta tenaio ‘u da tagware; Wate tauio ‘imu tomota ‘u da nuapupura, ta tamaio ‘ina anua;

¹¹ Ga king ‘amu ‘ita bobo‘ana ‘i da nuanuana; Tauna ‘imu ‘Inapwana ta ‘enega; ta ‘ena ‘u da bwagobwago.

¹² Ta Turo natuna mewainena ‘ena ‘i da miami ma‘ina ‘ebwaeadaita; Tugama to esaesa ‘imu tomota gamwagamwanidia ‘imu nua‘ole‘ole si da sida.

¹³ King natuna me wainena anua esaesa soranaia ‘i eesaesa maibo‘ana: ‘Ana ‘oama si ioniionina golega.

¹⁴ Si da ‘au‘ewena king ‘enaia ma‘ana ‘oama eiarina: Gomagweine ‘ana to ‘oaiabuiao taudi si murimuria Si da me‘edi ‘emuia.

¹⁵ Uiawanega ta eguausoarega si da ‘au‘ewadi: King ‘ina anuaesaesa ‘ena si da rugu.

¹⁶ Tamamiao ‘adi lopa‘eru natumiao, Taudi ‘u da bubudi be si da e ‘inapwanao bare‘u maibo‘ana ‘enaia.

¹⁷ ‘Amu esana ‘ana nua‘i‘isi ia da sa‘u epata tomota iauiauna ‘edia; Ta ‘enega tomota si da lotuputupu ‘emuia ataia ta ataia.