Salamo 44 - Buki Tabu Lowaenei 1919

SALAMO 44.

¹ Eaubada ie, tenamega ‘a nonona, tamamao si simana ‘emaia, Guinua nina ‘u mweruruina ‘idi asiatao, asiata lowaenei.

² ‘Ebeloinao ‘u pa‘idi nimamuiega, ta ‘u asodi soranaia; Tomota ‘adi ‘elo‘uia ‘u sa‘una, ta ‘u lelewanedi.

³ ‘Asa nina nigea si ‘ewena taudi ‘idi sisi‘saiega, Nai taudi nimadi i ‘etoseedi; Ta ataio, ta nimaio ta maniniio ‘ina ma‘edana, ‘Oio ma‘imu nua‘ole‘ole ‘edia ta ‘enega.

⁴ ‘Oio ‘igu King, Eaubada ie: ‘Etoseana ‘u da loina Iakobo manuna,

⁵ ‘Emuiega ‘ama tarauwarao ‘a da ‘ausepara mwa‘utedi; ‘Amu esanega taudi si tooro matamaia ‘a da aiaidi.

⁶ ‘Agu tupu gea‘abo ‘ena ia da ‘emisa, Ta ‘igu sisi‐saia gea‘abo ‘i da ‘eto‘etoseegu.

⁷ Ta ‘oio ‘ama tarauwarao ‘ediega ni‘atu u ‘etoseema, Ta taudi si nuato‘umali ‘emaia ni‘atu ‘adi omaiamaia ‘u sa‘una.

⁸ Eaubada ‘ena ‘a lotuputupu asiata maibo‘ana, Ta ‘amu esana ‘ena ‘a da lokagutoki ataia. (Sela.)

⁹ Ta gete ni‘atu u ‘ulema, ta losinara ‘ena u ‘au‘ewema; Ta nigea ‘u tautauiawa ‘ima pwaru ma‘edi.

¹⁰ ‘U bubuma be tarauwara ‘enega ‘a sana‘ilama: Ta taudi nuadi ‘i to‘umali ‘emaia si ‘oae taudi manudi.

¹¹ Ni‘atu ‘u tagwarema sipi ‘atua masura manuna; Ta ‘ebeloina ‘edia ni‘atu ‘u lelewanema.

¹² ‘Imu tomota ‘u gimwanidaisidi, Ta ‘imu gwegwe nigea ‘u loeposeane ‘adi e‘isa ‘enega.

¹³ ‘U bubuma be gosemao si ba‘ema, ‘A e‘ebesinara ta ‘a e‘ebetuietuiea taudi si sakowasiema ‘edia.

¹⁴ ‘U bubuma be ‘a e‘ebeonabesobeso ‘ebeloinao ‘edia, ‘Ebelonepanepa tomota ‘edia.

¹⁵ Asiata maibo‘ana ‘agu losinara mataguia ‘i miami, Ta maninigu ‘ina omaiamaia ‘i bodegu,

¹⁶ Tauna ‘i ba‘eba‘e ta ‘i onaonabesobeso ‘enana manuna; Tarauwara be to e‘isa manudi.

¹⁷ Gete maibo‘ana ‘emaia ‘i mai; ta nigea ‘a nuanuapupureio, Ta nigea ‘a bubuna kabokabo ‘imu ona‘upa‘upa ‘enaia.

¹⁸ Atema nigea ‘i sanasana‘ila, Ta ‘ima tautauia nigea si mwa‘umwa‘uta ‘imu ‘edega;

¹⁹ Ta warigoa ‘idi esena ‘ena ‘u lelewanema, Ta mwawasa ‘ana iauiaukwa ‘enega ‘u bodema.

²⁰ ‘Abo ‘ima Eaubada ‘ana esana ‘a nuapupurena, Nai nimana ‘a lagata eaboaine dumadumana ‘enaia;

²¹ Gea‘abo nai Eaubada ‘iage gete ‘i da ‘ebese? Tauna ‘ate ‘ina iage kwaia ‘i mwaratoni ta ‘enega.

²² Tamo, manuio si loemwawasima asiata maibo‘anega; Si sawema ‘atua sipi unua manuna.

²³ ‘U da losuiaeio, Inapwana ie! to‘ase manuna u ‘eno‘eno? ‘U da tooro, gea‘abo u ‘ula‘ula ataema.

²⁴ To‘ase manuna maniniio ‘u bodena, Ta ‘ima elo‘uia ta ‘ima mia to‘umali ‘u nuapupurena?

²⁵ Iaruiaruama ‘i a‘opu‘opu nedila ‘ena ta ‘enega: Gamwama bare‘u ‘ena ‘i toritori.

²⁶ ‘U da tooro ‘ama lema manuna, Ta ‘u da li‘amima ‘imu obobomanua‘ole‘ole manuna.