Salamo 43 - Buki Tabu Lowaenei 1919

SALAMO 43.

¹ Eaubada ie, ‘U da loinegu, ta manugu ‘U da etara ‘ebeloina nigea tapwaroro matanaia: Tai kabokabo ta nigea paruparuna ‘enega ‘u da ‘etoseegu.

² ‘Oio ‘igu waiwai ‘ina Eaubada; to‘ase manuna ‘u e‘idi‘idiegu? To‘ase manuna ia lopilidadana ma‘igu dedoi tarauwara ‘ina didiga manuna?

³ ‘Imu ma‘edana ta ‘imu ona‘ai‘aila ‘u da etunenama; taudi si da nuganegu; Si da ‘au‘eweguma ‘imu ‘oea tabu ‘enaia, Ta ‘imu anua‐tabenakele ‘edia.

⁴ Ga ia da tauia Eaubada ‘ina ‘ebetaria ‘enaia, Eaubada ‘igu ‘ebeguausoara ‘ana uiawana ‘enaia: Ta api ‘ena ia da tupuio, Eaubada ie, ‘igu Eaubada.

⁵ Iaruiaruagu ie, to‘ase manuna ‘u a‘opu‘opu? Ta to‘ase manuna ‘u loniu soraguia? Eaubada ‘ena ‘u da nuaiaina: ‘etamo ia da tupuna ta ‘enega, Tauna maninigu ‘ina ‘ebebobo‘ana, ta ‘igu Eaubada.