Salamo 42 - Buki Tabu Lowaenei 1919

SALAMO 42.

¹ Nadigega kerei boasi daudaudi manudi ‘i eiawasipelapela, Nadigega iaruiaruagu ‘i eiawasipelapela manuio, Eaubada ie.

² Iaruiaruagu Eaubada manuna tona‘ana ‘i iapasa, Eaubada maiawasina manuna: Maisa nai ia da mai be Eaubada matanaia ia da apwesa?

³ Mataserugu ni‘atu si e ‘agu masura ‘asiataia be boiboia, ‘Ena tuta maibo‘ana ‘eguia si gwae, ‘Imu Eaubada mwa‘onai?

⁴ Iage getedi ia nua‘i‘isidi, ta iaruiaruagu ia siwena soraguia, Bubuna nina ‘enega pwaru ma‘eguao ‘a tauia, ta ia ‘au‘ewedi Eaubada ‘ina anuaia, Eguausoara ta tuputupu ‘enadiega, pwaru asiata tabu si ‘ita‘i‘isina.

⁵ Iaruiaruagu ie, to‘ase manuna ‘u a‘opu‘opu? Ta to‘ase manuna ‘u loniu soraguia? Eaubada ‘ena ‘u da nuaiaina: ‘etamo ia da tupuna ta‘enega Maninina ‘ana ‘ebebobo‘ana manuna.

⁶ ‘Igu Eaubada ie, iaruiaruagu ‘i mwau soraguia: Ta ‘enega ia nua‘i‘isimu ‘asa Ioridanega, Ta ‘Erimona ‘ediega, ‘oea gidarina Misara ‘enega.

⁷ Ni‘u ‘i bwau ni‘u ‘enaia ‘imu wagawowoli ‘enadi ‘enaia: ‘Imu lisu ta ‘imu lepo iauiauna ni‘atu si siwatautaugu.

⁸ Ta Ieoba ‘ina oboboma nua‘ole‘ole ‘i da loina asiata ‘enega, Ta boiboi ‘ana wari ‘i da miamia ma‘ieagu, Tamo sidasida ‘e bweuna iawasigu ‘ina Eaubada ‘enaia.

⁹ Ia da ona Eaubada ‘igu gurewa ‘enaia, To‘ase manuna ‘u nuapupuregu? To‘ase manuna ia lopilidadana ma‘igu dedoi tarauwara ‘ina didiga manuna?

¹⁰ ‘Atua sisi‐saiega lulugu ‘edia, ‘agu tarauwarao si ba‘egu; ‘Ena si onaona tuta iauna ‘eguia, ‘Imu Eaubada mwa‘o?

¹¹ Iaruiaruagu ie, to‘ase manuna ‘u a‘opu‘opu? Ta to‘ase manuna ‘u loniu soraguia? Eaubada ‘ena ‘u da nuaiaina: ‘etamo ia da tupuna, Tauna maninigu ‘ina ‘ebebobo‘ana, ta ‘igu Eaubada.