Salamo 41 - Buki Tabu Lowaenei 1919

SALAMO 41.

¹ Tauna gomabeso i ‘ita‘i‘isidi tauna ‘i bobo‘ana; Ieoba ‘i da ‘etoseena to‘umalina ‘ana asiata ‘enega.

² Ieoba ‘i da ‘ita‘i‘isina, ta iawasina ‘i da sa‘u, ta ‘i da mia bobo‘ana bare‘uia; Ta gea‘abo ‘u da tagwarena ‘ana tarauwarao nuadi ‘enaia.

³ Ieoba ‘i da giepa‘arina neneta ‘ana ‘ebe‘eno ‘enaia: ‘Ina ‘ebe‘eno maibo‘ana ‘u bubuna ‘ina le‘oasa ‘enaia.

⁴ Ia ona, Ieoba ie, ‘u da ‘atenua‘ole‘oleiegu; Iaruiaruagu ‘u da giebobo‘anena; ni‘atu ia loegesi ‘emuia ta ‘enega.

⁵ ‘Agu tarauwarao to‘umalina si oneone manugu, si gwaegwae, Maisa nai ‘i da mwawasa, ta ‘ana esana ‘i da saoora?

⁶ Ta ‘abo ‘i mai sabi ‘itegu, ‘i onaona besobeso; ‘Atena bubuna bokobokona ‘i egogonena taunamo ‘enaia; ‘Ena ‘i tautauia dadana, ‘i simasimane.

⁷ Iauiaudi si guitoasegu si e‘awaonaona rererea manugu; Manugu ‘igu esilae si wasegigiena.

⁸ Si ona le‘oasa to‘umalina ‘ena ‘i miaiaina: Ta gete ‘enega i ‘eno‘eno ga gea‘abo wate ‘i da tootooro.

⁹ Tamo, gosiagu ‘ateguia, tauna ‘ena ia ‘emisa, tauna ‘igu masurega i ‘e‘ai, Tauna ‘ae‘edu‘eduna ‘i lisi‘auna ‘eguia.

¹⁰ Ta ‘oio Ieoba ie, ‘eguia ‘u da ‘atenua‘ole‘ole, ta ‘u da gietoorogu, Be ia da e‘isadi.

¹¹ Gete ‘enega ia mwaratoni ‘oio ‘eguia ‘u eguausoara. ‘Agu tarauwara nigea ‘i didigagu ta ‘enega.

¹² Ta manugu tuga, ‘u gietoorogu ‘igu bubuna ‘ai‘aila ‘enaia, Ta matamuia ‘u sa‘u ataegu.

¹³ Ieoba ta da tupuna, Iseraela ‘ina Eaubada, Mia ataia ‘enega ga mia ataia. Emeni ta Emeni.