Salamo 40 - Buki Tabu Lowaenei 1919

SALAMO 40.

¹ Ia iamwaiamwana ma‘anuaegu Ieoba manuna; Ta ‘eguia ‘i sana‘ilama, ta ‘igu bwau ‘i nonona.

² Wate i ‘au‘ewatu‘eiegu gaula ‘ebesaoorega, bwa‘a degudeguna ‘enega; Ta ‘aegu ‘i sa‘udi gurewa ‘enaia ta ‘igu tautauia ‘i giepa‘ara.

³ Ta wari auauna ‘awagu ‘ena ‘i sa‘una, tamo lotuputupu ‘ida Eaubada ‘enaia; Iauiaudi si da ‘itena, ta si da matauta, Ta Ieoba ‘ena si da ‘emisa.

⁴ Tai ‘i mia bobo‘ana tauna Ieoba ‘ina ‘ebe‘emisa, Ta to gagasa nigea ‘i da ‘amaiabedi, nai taudi kabo ‘edia si da nao.

⁵ Ieoba ie ‘igu Eaubada, guinua to sinabwa sadi ni‘atu ‘u guinuedi si iau‘ena‘ina, Ta ‘imu nuanuaiao manuma: Nigea kapekapeana ‘a da sau‘ai‘ailidi ‘emuia; ‘Abo manudi ia simana ta ia ona, Si iauwawasae ta nigea kapekapeana ia da sawedi.

⁶ Taria ta ‘ebwaeadaita nigea ‘edia ‘u eguausoara; Tenagu ni‘atu u ‘etobwaredi: ‘Ebwaeadaita gabugabu ta loegesi ‘ana ‘ebwaeadaita nigea nuanuaio.

⁷ Ga ia gwae, U ‘ita, ni‘atu ia mai; Buki wasiwasina ‘ena si ‘etoladi manugu:

⁸ Nua‘ai‘ailigu be ‘imu nuena ia da guinua, ‘igu Eaubada ie; Tamo, ‘imu loina ‘ategu soranaia ‘i miami.

⁹ Deriegogona sinabwana ‘ena bubuna paruparuna ni‘atu ia guguia‘ena; U‘ita, sopagu gea‘abo ia da ‘etobodena, Ieoba ie, ‘u mwaratoni.

¹⁰ ‘Imu bubuna paruparuna nigea ia sa‘u kwaiena ‘ategu soranaia; ‘Imu bubuna ‘ai‘aila ta ‘imu ‘etoseana ni‘atu ia simane: ‘Imu oboboma nua‘ole‘ole ta ‘imu ona ‘ai‘aila nigea ia sa‘usa‘u kwaiedi deriegogona sinabwana ‘enega.

¹¹ Ieoba ie, ‘imu nua‘ole‘ole nuana gea‘abo ‘eguia ‘u da egagare: ‘Imu oboboma nua‘ole‘ole ta ‘imu ona ‘ai‘aila si da ‘ita‘i‘isigu ataia.

¹² To‘umalinao ta sawaiogenedi si mia‘oabu‘oabuiegu ta ‘enega, ‘Igu bubuna bokobokodi ni‘atu si ‘ewegu, ta ‘enega nigea ia ewaiwai be ia ‘ita tu‘e; Debagu uiauiana ‘adi iau si pilisinena, ta ‘ategu ni‘atu ‘i e‘idi‘ediegu.

¹³ Ieoba ie, ‘u da nuabobo‘ana be ‘u da ‘etoseegu: ‘U da lomanini be ‘u lemegu, Ieoba ie.

¹⁴ Taudi iaruiaruagu si ‘ebese be si loesaoorina Si da omaiamaia ta si da nuamwau rererea; Taudi ‘igu esilae manuna si ‘eguausoara Si da sana‘ilawa be tomota si da sinaridi.

¹⁵ Taudi ‘eguia si gwae, Ee, Ee, Si da mia waborebore ‘adi omaiamaia manuna.

¹⁶ Iauiaudi si ‘ebeseio si da guausoara be si da ‘uiawana ‘emuia; Taudi ‘imu ‘etoseana si nuanuana si da ona tuta iauna, Ieoba ta da ‘awasinabwae.

¹⁷ Ta ‘abo‘agu ia goamabeso ta ia nanaewa; Ta ‘Inapwana ‘i nua‘i‘isigu: ‘Oio ‘agu lema ta ‘agu to‘etoseana; Gea‘abo ‘u so‘iso‘i, ‘Igu Eaubada ie.