Salamo 4 - Buki Tabu Lowaenei 1919

SALAMO 4.

¹ ‘Igu bubuna paruparuna ‘ina Eaubada ie, ‘Ena ia bwau ‘eguia ‘u da ona limana; ‘Ena ia mia dedoi ‘u li‘amigu: ‘U da ‘atenua‘ole‘oleiegu, ta ‘igu sidasida ‘u da nonona.

² ‘Omi tomota natunao, tuta ‘eisa ‘igu esaesa ‘i da ‘ebunina ‘ebesinara ‘enaia? Tuta ‘eisa bubuna besobeso wa da obobomena, ta bubuna kabokabo wa da ‘ebesa? (Sela.)

³ Ta wa da mwaratoni Ieoba tauna ‘i tapwaroro ‘ai‘aila ‘i sa‘u dumedumena taunamo manuna: Ieoba ‘i da nono tuta ‘enega ia bwau ‘enaia.

⁴ Wa da ‘amaiabe, ta gea‘abo wa loegesi; Wa da nuanua ‘atemi taumimo ‘enaia ‘imi ‘ebe‘eno ‘ena, ta wa da miaenono. (Sela.)

⁵ Bubuna paruparuna ‘ana taria wa da ‘ebwaeae, Ta Ieoba ‘ena wa da ‘emisa.

⁶ Iauiaudi si miami si gwae, Iaita bobo‘ana ‘i da e‘ita ‘emaia? Ieoba, maninio ‘ina ma‘edanega ‘u da e‘itema.

⁷ Guausoara ni‘atu ‘u sa‘u wawasae ‘ateguia, Ta gidarina ‘idi guausoara ‘ena ‘idi witi ta ‘idi oine si sinabwa.

⁸ Guguia ‘ena ia da ‘eno‘eno ta ia da ‘enomwataia ruarua: Tebweuio, Ieoba, ‘u bubuna ‘ai‘ailegu ga ia mia ‘ai‘aila.