Salamo 39 - Buki Tabu Lowaenei 1919

SALAMO 39.

¹ Ia ona, ‘igu ‘edao ia da ‘ita‘i‘isi, Be ‘enega gea‘abo meiaguiega ia da loeloegesi: ‘Awagu ia da ‘ita‘i‘isi ‘ebe‘etoboda ‘enega, Tuta ‘enega to to‘umalina mataguia ‘i miami.

² Ia ‘araenono emwa‘uleiiega, ia enono, tamo bobo‘ana ‘enega; Ta ‘igu dedo ‘i loniu.

³ ‘Ategu ‘i iaiiai soraguia; Tuta ‘enega ia nuanua awe ‘i ‘ara‘arasina: Ga ia gwae meiaguiega;

⁴ Ieoba, ‘igu ‘ebelosaroni ‘u da e‘itae ‘eguia, Ta ‘igu asiatao ‘adi ‘etopwapwa, to‘ase nai; ‘Igu tabataba ‘ana bubuna ‘u da e‘itegu.

⁵ U ‘ita, ‘agu asiatao ‘u bubudi nima ‘adi bababa ‘atua; Ta ‘agu tuta matamuia iage nigea ‘atua; Ona ‘ai‘aila, tai ‘ebweuna ‘e bweuna ‘ina miamia to boboana sana ‘i eiage besobeso maibo‘ana. (Sela.)

⁶ Ona ‘ai‘aila tai ‘e bweuna ‘e bweuna ‘i lopilidadana besobeso: Ona ‘ai‘aila si loniu besobeso: Gwegwe ‘i sa‘uepopoena, ta nigea ‘i mwaratoni iaita ‘i da egogonedi.

⁷ Ta gete tuga, ‘Inapwana, to‘ase manuna ia iamwaiamwana? ‘Igu nuaiaina ‘emuia ‘i miami.

⁸ ‘Igu li‘oa‐loina iauiauna ‘ediega ‘u da ‘etoseegu; Gea‘abo ‘u da bubugu be ‘abo‘agu toeuwauwa ‘idi ‘ebesinara.

⁹ Ia ‘ara‘enono, ‘awagu nigea ia ‘ebarina; ‘Oio ‘u guinuena ta ‘enega.

¹⁰ ‘Imu unua ‘eguiega ‘u da tauiena: Nimaio ‘ana unuega ia gumwara.

¹¹ ‘Ena tai ‘u gieparuparuna ba‘e ‘ediega bubuna bokobokona manuna, ‘Ana ‘ita bobo‘ana ‘u bubuna be ‘i gumwagumwara manumanua ‘atua; Ona ‘ai‘aila tai ‘e bweuna ‘e bweuna ‘i eiage besobeso. (Sela.)

¹² Ieoba ie, ‘igu sidasida ‘u da nonona, ta ‘igu bwau ‘ena ‘u da sana‘ilama; Gea‘abo ‘u miamia emwa‘ule mataserugu ‘edia; ‘Abo‘agu to‘u‘umara ‘emuia ta ‘enega, To sugalagala, nadigega tamaguao iauiaudi.

¹³ ‘U da logwagwadegu, be ‘enega ia da pa‘ara limana, Ga muriega gete ‘enega ia da tauia, ta gea‘abo ia da miami.