Salamo 38 - Buki Tabu Lowaenei 1919

SALAMO 38.

¹ Ieoba ie, gea‘abo ‘u da ba‘egu ‘imu gamwasoara ‘enega: Nai ‘u da sapigu ‘imu gamwasoara iaiiainega.

² ‘Amu tupu ‘ina gitao si badigu ta ‘enega, Ta nimaio ‘i mwau ‘eguia.

³ Nigea ‘e bweu bobo‘ana esiogu ‘ena ‘imu gamwasoara manuna; Ta nigea ‘ebweu bobo‘ana luluguao ‘edia ‘igu loegesi manuna.

⁴ ‘Igu bubuna bokobokodi si mia debaguia; ‘Atua ‘a‘ara mwauna si mwauwawasae ‘eguia.

⁵ ‘Agu ‘abiiama si mwa‘ulu ta si daula, ‘Igu euwauwa manuna.

⁶ Ia ‘elo‘uia ta ia kopukopu sinabwana; Asiata maibo‘ana ia dedoi.

⁷ Tolobwagu ‘i maa ‘aratega; Ta nigea ‘e bweu bobo‘ana esiogu ‘ena.

⁸ Ia neneta ta ia ‘elo‘uia sinabwana; Ni‘atu ia bwau toila ‘ategu ‘ina loniu manuna.

⁹ ‘Inapwana, ‘igu iarakwaia maibo‘ana matamuia ‘i miami; Ta ‘igu sidasida ‘elo‘uia manuna nigea ‘emuiega ‘i mia kwaia.

¹⁰ ‘Ategu ‘i tunatuna, ‘igu waiwai ‘i pilisinegu; Ta matagu ‘ina ma‘edana manuna, tauna wate ‘eguiega ‘i tauia.

¹¹ ‘Agu to obobomao ta goseguao ‘agu muia ‘enega si tooro dumaduma; Ta ‘igu susu si tooro ‘edasora.

¹² Taudi wate iawasigu si ‘ebese sikwa si sa‘udi; Ta taudi ‘agu elo‘uia si ‘ebese iage wasegigi si oneone, Ta bubuna kabokabo si nuedi asiata miabo‘ana.

¹³ Ta ‘abo‘agu, atua tai tenatuituina, nigea ia nonono; Ta ‘abo‘agu ‘atua tai uwauwana nigea ‘awana ‘i da ‘ebarina.

¹⁴ Tamo, ‘abo‘agu ‘atua tai nigea ‘i nono, Ta ‘awana ‘ena nigea ‘ebeba‘eiao.

¹⁵ Ieoba ie, ‘emuia ia nuaiaina ta ‘enega; ‘Oio ‘u da ona limana, ‘Inapwana ie ‘igu Eaubada.

¹⁶ Ia ona ta ‘enega, Nai manugu si ‘e‘eguausoara: ‘Ena ‘aegu ‘i newanewa, si gitu‘eiedi ‘eguia.

¹⁷ ‘Abo‘agu ‘i abe ia tooromo ta ‘enega, Ta ‘igu dedoi mataguia ‘i miaataia.

¹⁸ ‘Igu bubuna bokobokona ia da simane ta ‘enega; ‘Igu loegesi manuna ia da dedoi.

¹⁹ Ta ‘agu tarauwarao si etapewa, ta si pa‘ara; Ta taudi si guitoasa daitegu si eiau.

²⁰ Taudi wate bubuna to‘umalina si e‘isena bubuna bobo‘ana manuna. Si etarauwara ‘eguia, iage bobo‘ana ia muriena ta ‘enega.

²¹ Ieoba ie, gea‘abo ‘u e‘idi‘idiegu: ‘Igu Eaubada ie, gea‘abo ‘eguiega ‘u miamia ‘edasora.

²² ‘U da lomanini be ‘u da lemegu, Ieoba ie ‘agu ‘etoseana.