Salamo 37 - Buki Tabu Lowaenei 1919

SALAMO 37.

¹ Gea‘abo nuaio ‘i da soa to guinua to‘umalina manudi, Nai ‘u da e‘ipi‘ipi taudi bubuna nigea paruparuna si guinuena ‘edia.

² Manini si da ‘upwedi nedu ‘atua ta ‘enega, Ta si da ‘oaperu pwatura karakarawina na‘ieana.

³ Ieoba ‘ena ‘u da ‘emisa, ta bobo‘ana ‘u da guinuei; ‘Asa ‘ena ‘u da miami, ta bubuna ‘ai‘aila ‘u da muriena.

⁴ Wate ‘u da eguausoara tauio Ieoba ‘enaia: Ta ‘ateio ‘ina ‘awanoi ‘i da ‘ebwaeio.

⁵ ‘Imu ‘eda Ieoba ‘ena ‘i da tagware; Wate ‘ena ‘u da ‘emisa, ta tauna ‘i da gieapwesenama.

⁶ Ta ‘imu bubuna paruparuna ‘i da gieapwesenawa ma‘edana ‘atua, Ta ‘imu loina asuoreore ‘atua.

⁷ Ieoba ‘ena ‘u da miaenono, ta manuna ‘u da iamwaiamwana ma‘anuaeio: Gea‘abo nuaio ‘i da soa tauna ‘i sinabwa ‘ina ‘ebetauia ‘enaia manuna, Tai nina wasegigi geiogeioi ‘i gieapwesenama manuna.

⁸ Gamwasoara ‘u da sa‘u, ta nua to‘umali ‘u da pilisinena: Gea‘abo nuaio ‘i da soa, tauna guinua to‘umalina ‘i lemena tugai.

⁹ To guinua to‘umalina si da ‘upwedi ta ‘enega: Ta taudi Ieoba ‘ena si ‘iamwaiamwana, ‘asa si da ‘ewena.

¹⁰ Tuta gidarina tuga ta ‘enega, ta to to‘umalidi gea‘abo si da miami: Tamo, ‘ina esena ‘u da nua‘i‘ita waiwai, ta gea‘abo ‘i da miami.

¹¹ Ta taudi ‘idi bubuna nuana ‘asa si da ‘ewai; Ta si da uiawana taudimo guguia sinabwana manuna.

¹² To to‘umalina ‘i wasegigi to paruparuna ‘enaia. Ta ‘i esara‘i‘ita ‘enaia.

¹³ Ieoba ‘i da edagi ‘enaia: I ‘itena ‘ina asiata ‘i memai ta ‘enega.

¹⁴ To to‘umalidi sisi‐saia ni‘atu si lisi lolona, ta ‘idi tupu ni‘atu si lisina; Be gomabeso ta tomia nanaewa si da ‘ula mwa‘utedi, Be taudi paruparudi ‘edega si da loemwawasi:

¹⁵ ‘Idi sisi‐saia ‘atedi taudi ‘ena ‘i da rugu, Ta ‘adi tupu si da lasedi.

¹⁶ To bubuna paruparuna ‘ina iage gidarina bobo‘ana wawasae To to‘umalina iaudi ‘idi iage sinabwana ‘enaia.

¹⁷ To to‘umalidi nimadi si da lasedi ta ‘enega: Ta Ieoba to bubuna paruparuna ‘i giiaidi.

¹⁸ Ieoba taudi bobo‘ai‘ailidi ‘idi asiata ‘i mwaratonidi; Ta ‘adi ‘egu‘eguia ‘i da miaataia.

¹⁹ Tuta to‘umalina gea‘abo ‘ena si da omaiamaia: Ta tuta botana ‘ena si da maa.

²⁰ Ta to to‘umalidi si da saoora, Ta Ieoba ‘ana tarauwarao si da nadigega ‘ebe‘e‘ai iapana: Si da gabuna; ‘asu ‘ena si da ‘ara esawari.

²¹ To to‘umalina i ‘ewena, ta nigea ‘i iotuiotura lima; Ta to bubu paruparuna ‘i guinua nua‘ole‘ole, ta i ‘ebwaea.

²² Taudi ‘i onaobobomedi ‘asa si da ‘ewena ta ‘enega; Ta taudi ‘i eliedi si da ‘upwa iauledi.

²³ Tai ‘ina tautauia si pa‘ara Ieoba ‘enega; Ta ‘ina ‘ebetauia ‘ena ‘i eguausoara.

²⁴ ‘Abo ‘i bebe‘u, gea‘abo ‘i da be‘ube‘u mwa‘uta wawasae: Ieoba ‘i giiaina nimanega ta ‘enega.

²⁵ Ni‘aenei ia egoama, ta gete ‘enega ia etai sinabwa; Ta nigea to bubu paruparuna ia ‘itena si da pilisinena, Nai tubunao ‘adi masura si esidasida.

²⁶ Asiata maibo‘ana ‘i bubuna nua‘ole‘ole, ta ‘i e‘ebwa‘ebwaea; Ta tubunao si miamia bobo‘ana.

²⁷ To‘umalina ‘u da pilisinena, ta bobo‘ana ‘u da guinuei; Ta ‘u da miami ta tuta iauiauna.

²⁸ Ieoba loina ‘i nuanuana ta ‘enega, Ta ‘ina to‐iaruiarua‐‘esasedi nigea ‘i da pilisinedi: Si mia bobo‘ana ataia: Ta to to‘umalidi tubudiao si da ‘upwa‐iauledi.

²⁹ To bubuna paruparuna ‘asa si da ‘ewena, Ta ‘ena si da mia ataia.

³⁰ To bubuna paruparuna ‘awana ‘i onaona sinasinapu manuna, Ta meiana loina ‘i oneone:

³¹ ‘Ina Eaubada ‘ina loina ‘atenaia ‘i miami; Nigea ‘e bweu ‘ina sa‘ulaga ‘i da newanewa.

³² To to‘umalina to bubuna paruparuna ‘i lomata‘i‘isina, Ta i ‘ebesena be ‘i da ununa.

³³ Ieoba nigea ‘i da pilisinena nimanaia, Nai ‘i da ‘awa to‘umaliena ‘ena si etaraeena.

³⁴ Ieoba ‘ena ‘u da iamwaiamwana, ta ina ‘eda ‘u da ‘ita‘i‘isi, Ta ‘i da gitu‘eieio be ‘asa ‘u da ‘ewena: ‘Ena to to‘umalidi si ‘upwa‐iauledi, ‘u da ‘itena.

³⁵ To to‘umalina ia ‘itena waiwai sinabwana ‘ena, Ta kaiwe karakarawina ‘ana bwa‘a ‘ai‘aila ‘enaia nadigega tauna ‘i tagara.

³⁶ Ta ia tauia, ta, wa ‘ita, nigea ‘i miami: Tamo, ia ‘ebesena, ta nigea ia lobaloba.

³⁷ Tai bobo‘ai‘ailina wa da lomata‘i‘isi, ta to bubuna paruparuna wa da ‘ita: Tai gote ‘ana ‘ebelosaroni ‘i guguia ta ‘enega.

³⁸ Ta to li‘oa‐loina manudi, si da saoora rererea: To to‘umalidi ‘adi ‘ebelosaroni si da ‘upwaiaulei.

³⁹ Ta to paruparudi ‘adi ‘etoseana Ieoba ‘enega; Tauna ‘idi ‘ebegiiaina‘i‘ita tuta elo‘uia ‘enaia.

⁴⁰ Ta Ieoba ‘i lemedi, ta i ‘etoseedi; To to‘umalidi ‘ediega ‘i da lisi‘iledima, ta i ‘etoseedi, ‘Ena si pililobodaboda ta ‘enega.